Швейцарын эрдэмтэд хүний нуруунд тусгай электрод суулгах замаар ослын улмаас суугаа болсон өвчтөнүүдийг хөл дээр нь босгож чаджээ.
Лозанн дахь Швейцарын Холбооны Технологийн Хүрээлэнгийн профессор Грегор Куртин, Лозанны их сургуулийн профессор Жоселин Блок нарын зохион бүтээсэн уг системийн туршилтын үр дүнг Nature Medicine анагаах ухааны сэтгүүлд өчигдөр нийтэлсэн байна.
Тэд 29-41 насны гурван эрэгтэй өвчтөний нуруунд уян электрод суулгаж, түүнийгээ утасгүй холбоогоор холбогдсон таблет төхөөрөмжөөр удирдах боломж олгосон байна.
Электрод нь тархинаас булчингуудад өгдөг мэдрэлийн дохиог орлуулах цахилгаан дохиог гаргадаг ажээ.
Ингэснээр өвчтөн босож зогсох, алхах, дугуй унах, усанд сэлэх зэрэг үйлдлүүдийг гүйцэтгэх чадвартай болсон байна.
Тухайлбал алхахаар бол хөлийн холбогдох булчингуудыг ажиллуулах командыг таблетаасаа өгөх ёстой ажээ.
Электрод нуруунд суулгах хагалгаанаас хойш хэдхэн цагийн дараа өвчтөнүүд хөл дээрээ зогсож чадсан байна. Харин бусад үйлдлүүдийг сайн хийж сурахад 3-4 сарыг зарцуулжээ.
“Эхэн үедээ тийм төгс байгаагүй. Гэхдээ хэсэг хугацааны дасгалын дараа хөдөлгөөн нь улам сайжирсан” гэж профессор Блок ярьсан байна.
“Энэ технологийн тусламжтайгаар бид нуруу нугасны хүнд гэмтэлтэй хүмүүст хөл дээрээ дахин босох боломж олгож чадахаар боллоо” гэж профессор Куртин ярьжээ.
Электрод суулгуулсан гурван өвчтөний нэг Микел Роккатигийн алхаж байгааг дараах дүрс бичлэгээс үзэх боломжтой. 2017 онд мотоцикл унаж яваад осолд орсноор түүний биеийн доод хэсэг нь мэдээгүй болсон юм байна.
Michel Roccati, un patient italien souffrant d’une paraplégie complète suite à un accident de moto, a reçu le nouvel implant. Une tablette sans fil envoie les commandes de stimulation, lui permettant de se lever. pic.twitter.com/JFRfoC9I1C
— EPFL (@EPFL) February 7, 2022
Эх сурвалж: The Guardian