Бээжин 2022 наадмын эмэгтэйчүүдийн цанын үсрэлтийн тэмцээнээс таван тамирчныг зориуд томдсон хувцас өмссөн шалтгаанаар хассан байна.
Биедээ элбэгдсэн хувцас өмссөнөөр тэдний агаарт тогтох чадвар нэмэгдэнэ гэж албаныхан үзжээ.
Тэдний нэг Японы тамирчин Сара Таканаши олон хүний итгэл найдварыг алдсандаа уучлал гуйсан мэдэгдлийг Инстаграм хуудсандаа нийтэлсэн байна.
Түүний өмд гуяных нь өргөнөөс 2 см элбэг байсан шалтгаанаар тэмцээнээс хасагджээ.
Тэмцээнээс хасагдсан Германы тамирчин Катарина Алтхаус ийм гэнэтийн шийдвэр гаргасан Олон Улсын Цанын Холбоог хурцаар шүүмжилсэн байна. “Тэд эмэгтэйчүүдийн цанын үсрэлтийн төрлийг сүйрүүлж байна. Би 11 жил энэ төрөлд өрсөлдөхдөө хэзээ ч ийм шалтгаанаар хасагдаж байгаагүй. Миний хувцас шаардлагын дагуу байсан гэж би бодож байна” гэж тэр ярьжээ.
Түүний дасгалжуулагч Стефан Хорнгахер “Өвлийн олимпын наадмын үеэр ийм зүйл тохиолдсон нь харамсалтай. Өмнө нь бүх зүйл тодорхой болох ёстой байсан юм” гэж ярьсан байна.
Норвегийн тамирчин Анна Один Стром хувцас хэмжсэн энэ удаагийн аргыг өмнө нь хэрэглэж байгаагүйд гайхаж байгаагаа илэрхийлжээ. Тэр бас тусгаарлалтад долоо хоног байхдаа хангалттай хооллоогүйгээс жин нь хасагдаж, хувцас нь томдсон байх магадлалтайг ярьсан байна.
Эх сурвалж: Business Insider
