Беларусьт зохион байгуулагдсан байлдааны сургуулилалтад оролцсон цэргүүдээ үндсэн баазад нь буцаан татаж эхэлснийг ОХУ-ын батлан хамгаалах яам өчигдөр мэдээлжээ.
Тус улсын батлан хамгаалах яамны хэвлэлийн төлөөлөгч, хошууч генерал Игорь Конашенков “Зэвсэгт хүчний анги нэгтгэлүүд байлдааны сургуулилалтаа дуусгаад төлөвлөгөөний дагуу үндсэн бааз руугаа буцна. Өмнөд болон Баруун цэргийн тойргийн дивизүүд үүргээ гүйцэтгэж дуусаад автомашин болон галт тэргэнд ачигдаж эхэлсэн. Өнөөдөр бүгд бааз руугаа хөдөлнө” гэж мэдэгдсэн байна.
ОХУ, Беларусийн зэвсэгт хүчний хамтарсан байлдааны сургуулилалт өнгөрсөн долоо хоногт эхэлсэн бөгөөд хоёрдугаар сарын 20-нд дуусах төлөвлөгөөтэй байжээ.
Оросын цэргүүд Украины хил орчмоос буцаж эхэлсэн нь хурцадмал байдлыг намжаах найдлага төрүүлж байна.
Гэвч АНУ-ын ерөнхийлөгч дайн дэгдэх магадлал өндөр хэвээр байгааг өчигдөр дахин анхааруулжээ.
“Орос цэргээ татаж эхэлсэн нь сайн хэрэг. Гэхдээ бид энэ мэдээллийг баталгаажуулаагүй байна. Манай шинжээчдийн дүгнэлтээр бол Оросын зэвсэгт хүчний аюул өндөр хэвээр байгаа” гэж Байден мэдэгдсэн юм.
ОХУ-ын тал Украины хилийн орчимд нийтдээ 150,000 орчим цэрэг хуримтлуулж, Украин улсыг эзлэн түрэмгийлэхээр бэлдэж байна гэж өрнөдийн орнууд үзэж байгаа.
Харин Москвагийн эрх баригчид үүнийг няцааж, хуучин Зөвлөлтийн бүрэлдэхүүнд байсан Украиныг NATO-д элсүүлэхгүй байхыг шаардаж байна.
Хэрвээ элсүүлбэл Оросын үндэсний аюулгүй байдал эрсдэлд орно гэж Москвагийн эрх баригчид үзэж байгаа юм.
Тиймээс NATO-гийн өргөжилтийг зогсоох шаардлагыг Оросын талаас АНУ-д тавиад байгаа.
Байдены засаг захиргаа уг шаардлагыг хүлээж авахаас татгалзаж, Украин руу халдан довтолбол эдийн засгийн хатуу хориг арга хэмжээ авахаар сүрдүүлж байна.
Эх сурвалж: Russia Today, BBC
