Гадаадын хөрөнгө оруулагч, концесс эзэмшигч иргэний автомашинд хоёр хүн сууж айлган сүрдүүлэн Улаанбаатар хотын зах руу аваачиж зодож, улмаар концесс эзэмших эрхээсээ татгалзахыг шаардсан хэрэг гарчээ.

Энэ талаар Хууль зүй, дотоод хэргийн сайд Х.Нямбаатар мэдээлэл өглөө. Тэрбээр “Хэрэг өнгөрөгч 2021 онд гарсан. Тухайн хүний эрх чөлөөнд нь халдаж зодсон. Улмаар концесс эзэмших эрхээсээ татгалзахыг шаардаж гарын үсэг зуруулсан байсан. Тус бичгийг Төрийн ордны шуудангаар концесстой холбоотой байгууллага руу илгээсэн. Энэ хэргийг шалгаж байна. Одоо прокурорын байгууллага хэргийн шалгаж байгаа бөгөөд шүүх рүү шилжих шатандаа явж байна. Тус хэрэгт гадны иргэд бас давхар холбогдон шалгагдаж байна” гэв.

Х.Нямбаатар гадаадын хөрөнгө оруулагчдын эрх ашгийг хамгаалах ажлын хэсгийг ахалж ажиллаж байгаа бөгөөд энэ хүрээнд хийж буй ажлын тайланг удахгүй танилцуулна гэж хэллээ.