Бүгд Найрамдах Хятад Ард Улсын Засгийн газрын хөгжлийн албан ёсны туслалцааны хүрээнд тус улсын Худалдааны яамнаас Монгол эмч мэргэжилтнүүдэд зориулсан халдварт өвчин, элэг цөсний эмгэг судлалын чиглэлээр богино хугацааны сургалтыг 2018 оны 4 дүгээр сарын 4-нөөс 24-ний өдрүүдэд Хунань мужийн Цан Са хотод зохион байгуулах гэж байгаа. Үүнтэй холбогдуулж Эрүүл мэндийн яамны сайд Д.Сарангэрэл сургалтанд хамрагдах эмч нартай уулзалт зохион байгууллаа.

Эрүүл мэндийн  яамнаас сургалтын өгөөж, гарах үр дүнг нэмэгдүүлэх үүднээс сургалтыг монгол хэл дээр явуулах хүсэлт гаргасны дагуу энэ удаагийн сургалт монгол хэл дээр зохион байгуулагдах гэж байгаагаараа онцлог давуу талтай юм.

Энэ удаагийн сургалтад Улсын нэгдүгээр төв эмнэлэг, Халдварт өвчин судлалын үндэсний төв, нийслэлийн эрхийн эрүүл мэндийн төв болон нийт 18 аймгийн нэгдсэн эмнэлэг, Бүсийн оношилгоо эмчилгээний төвийн халдварт болон элэг цөсний эмгэг судлалаар мэргэшсэн дотрын эмч нар хамрагдаж байгаа ажээ.

 Эдгээр эмч мэргэжилтнүүд маань өөрийн байгууллагадаа нэр хүндтэй, олон жил тогтвор суурьшилтай, үр бүтээлтэй ажиллаж байгаа, энэхүү сургалтад хамрагдах чин хүсэл эрмэлзэлтэй манай чадварлаг эмч нар гэдгийг онцлон хэлмээр байна.Сургалтад оролцохтой холбогдон гарах бүхий зардлыг Хятадын талаас бүрэн дааж байна.

 Сургалтад хамрагдсан эмч нар маань өөрийн мэдлэг, туршлагыг улам батжуулж, шинэ мэдлэг, туршлага, мэдээллийг олж авах, сайн туршлагаас харилцан суралцаж, бусдад түгээн, өөрийн байгууллага дээр тодорхой өөрчлөлт хийж, шинэ санаа санаачилга нэвтрүүлнэ гэдэгт итгэлтэй байна.

                                                                                                             Эх сурвалж Шуурхай.мн