Өчигдөр буюу Лхагва гарагт Герман улсын засгийн газар Оросын эрчим хүчний хараат байдлаас салах зорилготой $180 орчим тэрбумын санхүүжилтийг баталжээ.
Шийдвэрийн дагуу 2023-аас 2026 оны хооронд Германы Уур амьсгал, Өөрчлөлтийн Санд 177.5 тэрбум еврог ($179.7 тэрбум) төвлөрүүлэхээр болсон байна.
Уг хөрөнгөөр Германы эдийн засгийн салбаруудыг орчин үеийн техник технологиор шинэчлэх, сэргээгдэх эрчим хүчний эх үүсвэрүүдийг өргөжүүлэх, устөрөгчийн түлшний салбарыг хөгжүүлэх зэрэг ажлуудыг санхүүжүүлэх гэнэ.
Ялангуяа Орос улс Украины газар нутагт халдан довтолсны дараа сэргээгдэх эрчим хүчний эх үүсвэрүүдийг өргөжүүлэх ажил “онцгой чухал” болсныг Германы сангийн сайд Кристиан Линднер хэвлэлийн хурлын үеэр ярьжээ.
Украины дайнтай холбоотой Европын Холбооноос ОХУ-ын эсрэг авч хэрэгжүүлж буй эдийн засгийн хоригийн хариуд Москвагийн эрх баригчид байгалийн хийн нийлүүлэлтээ бууруулсаар байгаа.
Үүний хамгийн том хохирогч нь Герман улс болж байна.
Тус улс ОХУ-аас Европын Холбоонд нийлүүлдэг хийн 40 хувийг дангаар хэрэглэдэг юм.
Эх сурвалж: Business Insider