Хэсэг хугацаанд нам тайван байсан Уулын Карабахын бүс нутагт өчигдөр зэвсэгт мөргөлдөөн гарах үеэр нийтдээ гурван цэрэг алагджээ.

Уулын Карабах бол Армени үндэстэн голлон суудаг Азербайжанаас салан тусгаарласан газар нутаг юм.

Армени, Азербайжан улсууд энэ газар нутгийн төлөө 1990-ээд он, 2020 онд хоёр удаа дайтаж байв. Сүүлд болсон дайны дараа Уулын Карабахын зарим хэсэг Азербайжаны хяналтад шилжиж, Москвагийн зуучлалтай гал зогсоох гэрээ байгуулсны дараа ОХУ-ын энхийг сахиулагчид байрлаж байжээ.

Өчигдөр болсон мөргөлдөөний дараа ОХУ-ын гадаад хэргийн яам гал зогсоох гэрээг зөрчсөн Азербайжаныг буруутгасан байна. Европын Холбоо дайсагнагч талуудад галаа зогсоохыг уриалжээ.

Өчигдөр эхлээд Карабахын салан тусгаарлагчдын цэргүүд Лачин дүүрэг дэх Азербайжаны армийн байрлал руу гал нээх үеэр хугацаат цэргийн нэг алба хаагч амь үрэгдэж, хэд хэдэн хүн шархадсан тухай Бакугаас мэдээлсэн байна.

Үүний дараа Азербайжаны арми хариу довтлоход салан тусгаарлагчдын хоёр цэрэг алагдаж, 14 цэрэг шархаджээ. Энэ мөргөлдөөний үеэр стратегийн ач холбогдолтой хэд хэдэн өндөрлөгийг эзлэн авснаа Азербайжаны батлан хамгаалах яам мэдээлсэн байна.

Сүүлд Армени улсын засгийн газар Азербайжаны талын түрэмгий үйлдлийг зогсооход туслахыг олон улсын хамтын нийгэмлэгээс уриалжээ.

Хоёр улсыг холбодог Лачиний коридорт Азербайжан дангаар хяналтаа тогтоох зорилготой байгааг Арменийн тал тайлбарласан байна.

ОХУ-ын энхийг сахиулагчид нөхцөл байдлыг тогтворжуулахаар Азербайжан, Арменийн талуудтай хамтран ажиллаж байгааг тус улсын батлан хамгаалах яам мэдэгджээ.

Лачиний коридорт Оросын 2,000 орчим энхийг сахиулагч байрладаг юм.

2020 оны намар зургаан долоо хоног үргэлжилсэн дайны үеэр 6,500 гаруй хүн амиа алдаж, Азербайжан улс Уулын Карабахын зарим хэсгийг өөртөө нэгтгэж байв. Өнгөрсөн сард Азербайжан улс эзлэн авсан нутаг дэвсгэртээ хүн амыг суурьшуулах ажлыг эхлүүлсэн бөгөөд үүнийгээ “Аугаа эргэн ирэлт” гэж нэрлэж байв.

Хоёр улсын зөрчил мөргөлдөөнд ОХУ гол эвлэрүүлэгчийн үүрэг гүйцэтгэсээр ирсэн. Гэхдээ Украинд эхлүүлсэн дайны улмаас дэлхийн тавцанд ганцаардсан ОХУ одоо Азербайжан, Арменийн асуудалд үзүүлэх нөлөө сулраад байгаа юм.

Эх сурвалж: AFP