Бямба гарагийн орой хийсэн ээлжит мэдэгдэлдээ Украины ерөнхийлөгч Володимир Зеленский тус улсын тусгаар тогтнолын өдөр Оросын талаас агаарын хүчтэй цохилт өгч болзошгүйг ард иргэддээ анхааруулжээ.

Энэ долоо хоногийн Лхагва гарагт буюу наймдугаар сарын 24-ний өдөр Украин улс Зөвлөлт Холбоот Улсын бүрэлдэхүүнээс гарч, тусгаар тогтнолоо зарласны 31 жилийн ой тохиох юм.

Бас Оросын цэрэг Украины газар нутагт халдан довтолсноос хойш яг зургаан сарын хугацаа өнгөрөх гэж байна.

“Энэ долоо хоногт Оросын талаас онцгой харгис, онцгой муухай зүйл хийхийг оролдож магадгүйг бид бүгд мэдэж байх хэрэгтэй” гэж хэлсэн Зеленский тусгаар тогтнолын ойн өдрөө эзлэн түрэмгийлэгчдэд айдас, цөхрөл түгээх боломж өгөхгүй байхыг ард иргэддээ уриалжээ.

Зарим хараат бус тагнуулын эх сурвалжуудын мэдээлж байгаагаар бол Оросын арми Беларусийн нутаг дэвсгэрт их хэмжээний зэвсэг бөөгнөрүүлж, шинэ довтолгоонд бэлдэж эхэлсэн байна.

Тухайлбал Беларусийн эх сурвалжийн мэдээлснээр тус улсын Зябровка агаарын баазад зэвсэг хуримтлуулж байгаа нь хиймэл дагуулаас авсан гэрэл зургаас тодорхой болжээ.

Maxar Technologies компанийн хиймэл дагуулын зураг дээр тэнд 10-14 ширхэг С-400 агаарын довтолгооноос хамгаалах систем, 3 ширхэг КАСТА-2Е2, 48Я6 Подлет радарын станц, 2 ширхэг Панцирь агаараас хамгаалах систем төвлөрөөд байгаа нь харагдаж байгаа гэнэ.

Эх сурвалжийн мэдээлснээр долдугаар сарын 28-ны өдрөөс хойш Беларусийн нутаг дэвсгэрээс Украин руу ганц ч пуужин харваагүй байгаа ажээ.

Тусгаар тогтнолын өдрийг тохиолдуулан Оросын тал Мариуполь хотод олзны цэргүүдийг шүүх хурал зохион байгуулах төлөвлөгөөтэй байгааг Украины цэргийн тагнуулын алба өчигдөр бас мэдээлсэн байна.

Эх сурвалж: Business Insider