Өнгөрсөн долоо хоногт Х.Баттулгын талын АН-ын их хурал хуралдаж, Ардчилсан намын Ерөнхий нарийн бичгийн даргын үүрэг гүйцэтгэгч Ишжамцын Мөнхжаргалыг Ерөнхий нарийн бичгийн даргаар жинхлэхийн сацуу Ардчилсан намын Тэргүүн дэд даргаар Ө.Шижир, АН-ын дэд даргаар Ш.Түвдэндорж, Б.Ган-Очир, Д.Бадарсан, Т.Пүрэвхатан, О.Алтангэрэл нарыг Ардчилсан намын Ээлжит бус Их хурлаар олонхийн саналаар томилсон билээ.
Мөн Ардчилсан намд тулгамдаад буй цаг үеийн асуудлуудыг хэлэлцэн шийдвэр гаргасан ба тодруулбал Х.Баттулга намын даргаас түр нэрээ татан, С.Эрдэнийн гэх талтай ойлголцон зөвшилцөж, хамтран ажиллах арга хэлбэрийг эрэлхийлэхээр болсон байна.
Ингэх шалтгаан нь юу байв? "Хорлон сүйтгэсэн" гэх зүйлчлэлээр яллагдах нь тодорхой болсон Х.Баттулгад хань, дэмжлэг хэрэгтэй байгаа. Иймээс ч тэрээр АН-ын дарга болно гэх амбицаа татаж, Ерөнхийлөгч асан Ц.Элбэгдоржтой биечлэн уулзжээ. Уулзалт эхэндээ нилээн ширүүн байсан ч аажмаар зөөлөрч, тэр бүү хэл Х.Баттулга, Ц.Элбэгдорж нар С.Баярцогтыг АН-ын дарга болох нь зөв гэж санал нэгджээ. Гэсэн ч яг үнэн хэрэгтээ АН-ын тамга Ц.Элбэгдоржид биш С.Эрдэнэд байгаа. С.Эрдэнэ Ц.Элбэгдоржийн үгэнд орохгүй. Иймээс ч Х.Баттулгад С.Эрдэнэтэй тусгайлан зөвшилцөхөөс өөр аргагүй болсон байна. Харин С.Эрдэнийн хувьд нэгэнт улаан цагаандаа гарч, намын дарга хэвээрээ байж байгаад УИХ-ын 2024 оны сонгуульд оролцоно гэдгээ ойр тойрныхондоо ярих болсон гэнэ.
Э.Мягмар
Sonin.mn
