Өнгөрсөн долоо хоногт Финландын 36 настай ерөнхий сайд Санна Мариний хувийн үдэшлэгийн дүрс бичлэг нийтэд цацагдсаны дараа тус улсын иргэдийн дунд түүнийг тухайн үед мансуурсан байж болзошгүй гэх сэжиг яригдаж эхэлсэн юм.
Энэхүү эргэлзээг арилгах зорилгоор ерөнхий сайд эмэгтэй Баасан гарагт мансууруулах бодисын шинжилгээ өгч байжээ.
Тэгвэл энэ шинжилгээний хариу Даваа гарагт гарч, Финландын ерөнхий сайд найз нартайгаа наргиж байхдаа ямар нэг мансууруулах бодис хэрэглээгүй нь тогтоогдсон байна.
Санна Маринаас авсан шээсний шинжилгээгээр кокаин, амфетамин зэрэг хэд хэдэн төрлийн мансууруулах бодисын ул мөрийг шинжилсэн тухай Финландын засгийн газар мэдээлжээ.
2019 онд Финландын түүхэнд хамгийн залуу ерөнхий сайд болж байсан Санна Марин үе үе иймэрхүү дуулианд нэр холбогддог.
Өнгөрсөн оны арванхоёрдугаар сард тэр коронавирусийн халдвар авсан хүний ойрын хавьтал болсноо мэдэж байсан ч үүр цайтал шөнийн клубт бүжиглэж, наргисан хэмээн шүүмжлүүлж байжээ.
Сүүлд найзуудтайгаа наргихдаа ерөнхий сайд эмэгтэй засгийн газраас олгосон утсыг гэртээ орхисон байсан нь тодорхой болсон юм. Улс оронд нь гэнэтийн хямрал тохиолдвол түүнтэй хэрхэн холбоо барих байсан тухай асуудал эндээс бас сөхөгдөж эхэлжээ.
Эх сурвалж: Bloomberg
