Гар утсыг SpaceX компанийн Starlinк үйлчилгээтэй холбосноор “сүлжээгүй газар” гэсэн ойлголт байхгүй болох гэж байгааг АНУ-ын харилцаа холбооны T-Mobile компани зарлалаа.
“Coverage Above and Beyond” нэртэй хамтын ажиллагааг зарлах арга хэмжээнд T-Mobile компанийн гүйцэтгэх захирал Майк Сиверт, SpaceX компанийн гүйцэтгэх захирал Илон Маск нар оролцсон байна.
Ингэснээр T-Mobile-ийн 5G гар утастай хэрэглэгчид үүрэн холбооны сүлжээний хамрах хүрээнээс гарсан тохиолдолд хиймэл дагуултай 2-4 Mbps хүртэл хурдаар холбогдож, зарим суурь үйлчилгээнүүд, мессенжэрүүдийг ашиглах боломжтой болох ажээ.
Хиймэл дагуулыг үүрэн холбоотой хослуулах энэ үйлчилгээ АНУ-ын эх газрын өнцөг булан бүр, Хавайн арал, Аляскын зарим хэсэг, Пуэрто Рико арлыг хамрах гэнэ.
“Үйлчилгээний туршилт ирэх оны сүүлээр сонгогдсон бүс нутагт эхэлнэ” гэж T-Mobile компанийн гүйцэтгэх захирал Майк Сиверт хэлжээ.
Ирэх оноос эхлэн тойрог замд байрлах Starlink-ийн хоёр дахь үеийн хиймэл дагуулууд T-Mobile-ийн ашигладаг дунд зурвасын PCS спектрийн дохиог дэмждэг болох гэж байгааг Илон Маск тайлбарласан байна.
Starlink V2, launching next year, will transmit direct to mobile phones, eliminating dead zones worldwide
— Elon Musk (@elonmusk) August 26, 2022
Гэхдээ хиймэл дагуултай холбогдсон тохиолдолд гар утасны хэрэглэгчид ердийн интернэт ашиглах боломжгүй, холболтыг нь дэмждэг дуудлага, мессэж, мессенжэр зэрэг зарим суурь үйлчилгээнүүдийг л ашиглах ажээ.
Шинэ үйлчилгээг ашиглахын тулд T-Mobile-ийн хэрэглэгчид гар утсаа солих, эсвэл нэмэлт төхөөрөмж авах шаардлагагүй юм байна.
Танилцуулах арга хэмжээний шууд дамжуулалт:
Эх сурвалж: The Verge