Энэ сарын эхээр Украины арми удаан хүлээлгэсэн сөрөг довтолгоогоо тус улсын өмнөд бүсийн Херсон мужаас эхэлж байв.

Уг ажиллагааны талаар урьдчилж, маш их мэдээлэл цацагдсан билээ. Харин сүүлд Херсоны чиглэлд төсөөлж байсан шиг том тулаан болсонгүй. Оронд нь Украины зүүн хойд бүсийн Харьков мужид гэнэтийн довтолгоо эхэлж, их хэмжээний газар нутгийг богино хугацааны дотор Оросын цэргээс чөлөөлөөд байна.

Энэ нь үнэндээ Оросын талыг төөрөлдүүлэх зорилготой арга заль байсныг Украины албаны эх сурвалж өчигдөр мэдээлжээ.

“Энэ бол худал мэдээлэл тараах томоохон ажиллагаа байлаа. Оросын тал үүнд хууртаж, бүх хүчээ өмнөд фронтод шилжүүлсэн. Харин сөрөг довтолгоо тэдний төсөөлж байгаагүй газраас эхэлсэн тул одоо цочролд орж, ухарцгааж байна” гэж Украины тусгай хүчний хэвлэлийн төлөөлөгч Тарас Березовец тайлбарласан юм.

Наймдугаар сарын 29-ний өдөр Украины цэргийн өмнөд тойргийн командлал Херсон мужийн чиглэлд сөрөг довтолгоо эхэлж байгаагаа зарлаж байв.

Гэвч өмнөд фронт дээр байгаа цэргүүд ямар нэг томоохон довтолгоо эхлэх шинжгүй байгааг гэрчилж байжээ. Сүүлийн хоёр долоо хоногийн хугацаанд Украины арми өмнөд хэсэгт хэд хэдэн жижиг тосгоныг чөлөөлснөөс өөр ахиц гаргаагүй байгаа.

Украины арми сүүлийн өдрүүдэд Харьков мужийн олон хот тосгодыг ээлж дараалан чөлөөлж байна. Өчигдөр стратегийн өндөр ач холбогдолтой Изюм хотыг эзэлсэн нь дайн эхэлснээс хойш Украины армийн байгуулсан хамгийн том ялалт болж байгаа юм.

Ингэснээр Украины зүүн хойд бүс нутаг дахь Оросын цэргийн бэхлэлт нуран унаж байна. Сүүлийн өдрүүдэд Украины армийн явуулсан хурдтай довтолгооны үр дүнд Харьковын эзлэгдсэн газар нутгийн гуравны нэг чөлөөлөгджээ.

Эх сурвалж: The Guardian