ОХУ-ын ерөнхийлөгч Владимир Путинд хамгийн үнэнч хүмүүсийн нэг гэгддэг Чечений БНУ-ын тэргүүн Рамзан Кадыров өчигдөр Украин дахь Оросын армийн ухралтыг ширүүн шүүмжилсэн мэдэгдэл хийжээ.
“Тэд алдаа гаргасан тул шаардлагатай дүгнэлтээ гаргах ёстой гэж би үзэж байна. Өнөө маргаашгүй стратегиа өөрчлөхгүй бол би батлан хамгаалах яам болон улсын удирдлагуудтай уулзаж, газар дээрх бодит байдлыг тайлбарлахаас өөр арга алга” гэж тэр Ням гарагт Телеграм хуудсандаа нийтэлсэн мэдэгдэлд өгүүлсэн байна.
Кадыровын мэдэгдлээс харвал Украины армийн сүүлийн өдрүүдэд гаргасан гэнэтийн амжилт Кремлийн удирдагчдын санааг нэлээд зовоож буй бололтой.
Одоо бүгд Оросын армийн ухралтын талаар Путин юу гэж хэлэхийг анхааралтай ажиглаж байна. Дайны эхэн үед Оросын зэвсэгт хүчин Киев хотыг хэдхэн өдрийн дотор эзлэх анхны төлөвлөгөө нь бүтэлгүйтэхэд тэр тодорхой тайлбар хэлээгүй юм.
Өнгөрсөн долоо хоногт Владивосток хотод болж өнгөрсөн Дорнын Эдийн Засгийн Чуулганы үеэр Путин энэ дайнаар Орос улс “юу ч алдаагүй, алдахгүй” тухай ярьж байв.
Украины фронтын шугамаас таагүй мэдээ ирж байсан Бямба гарагт Путин нийслэл Москва хотын өдрийг тэмдэглээд завгүй байсан нь Оросын зарим цэргийн судлаач, мэргэжилтнүүдийн шүүмжлэлийн бай болсон юм.
Эх сурвалж: The Guardian
