Гадаадын хөрөнгө оруулалтын эрх зүйн орчин сэдэвт хэлэлцүүлгийг ХЗДХЯ-наас өчигдөр зохион байгууллаа.

Тус яамнаас Гадаадын хөрөнгө оруулалтын тухай хуулийн шинэчилсэн найруулгыг боловсруулж, УИХ-ын намрын чуулганд өргөн барихаар бэлдэж буй. Энэ хүрээнд гадаадын Элчин сайдын яамны тэргүүнүүд, олон улсын худалдааны танхимын төлөөлөл болон хөрөнгө оруулалтын чиглэлээр мэргэжсэн хуульчдаас санал авах, тулгамддаг бэрхшээлийг тодруулах зорилгоор уг хэлэлцүүлгийг зохион байгуулсан юм.

Энэ үеэр ХЗДХ-ийн дэд сайд Б.Солонгоо Хөрөнгө оруулалтын тухай хуулийн өөрчлөлтийн талаар товч танилцуулав.

Тэрбээр “Монгол Улс анх 1993 онд Гадаадын хөрөнгө оруулалтын тухай хуулийг баталж байсан. Үүнээс хойш 2012 онд Стратегийн ач холбогдолтой гадаадын хөрөнгө оруулалтыг зохицуулах тухай хууль, 2013 оны аравдугаар сард Хөрөнгө оруулалтын тухай хуулийн анхдагч хуулийг баталж байсан. Энэхүү 2013 оны хуулийн шинэчлэхээр ажлын хэсэг байгуулагдан ажиллаж байна. Миний бие энэ ажлын хэсгийг ахалж байгаа.

Монгол Улсын эдийн засгийг тогтвортой, хүртээмжтэй хөгжүүлэхэд гаднын хөрөнгө оруулалт зайлшгүй хэрэгтэй. Үүний тулд бид хөрөнгө оруулагчдад ямар бодитой дэмжлэг үзүүлэх вэ гэдэг дээр анхаарал хандуулж байгаа.

Өнөөдөр хүчин төгөлдөр үйлчилж байгаа Хөрөнгө оруулалтын тухай хууль нь нэг мөр хэрэгжихгүй, ойлгомжгүй, тодорхойгүй байдал их байдаг. Хуулийн шинэчилсэн найруулгад эдгээр асуудлыг тодорхой болгохоор ажиллаж байна. Тухайлбал, Эдийн засаг, хөгжлийн яамны харьяанд байгуулагдах Хөрөнгө оруулалтын асуудал эрхэлсэн агентлагийн чиг үүргийг илүү тодорхой болгоно.

Мөн хөрөнгө оруулагчтай маргаан үүсэхээс өмнө гомдол саналыг нь сонсож, эрх ашгийг нь хамгаалах зөвлөлийг байгуулна. Хөрөнгө оруулалт хийж байгаа гаднын болон дотоодын хөрөнгө оруулагчдад үзүүлэх дэмжлэг, эдийн засгийн баталгаа юу байх вэ гэдгийг тодорхой болгоно.

Өнөөдөр хөрөнгө оруулагчдын зүгээс хамгийн их тавьдаг асуудал бол Хөрөнгө оруулалтын тухай хуульд заасан татварын болон бусад дэмжлэг практикт хэрэгжихгүй байна, татварын бодлого ойлгомжгүй, гадаадын хөрөнгө оруулалттай аж ахуйн нэгж гэдэг тодорхойлолтоор яг хэнийг хэлэх вэ гэдэг хүртэл маргаан дагуулдаг зэрэг асуудлууд бий.

Бидний баримталж байгаа бодлого бол Монгол Улсад хөрөнгө оруулж байгаа тохиолдолд аль болох дэмжинэ. Гэхдээ ашигтай ажиллаж, Монгол Улсад шударгаар татвар төлөх шаардлага тавьж байгаа. Харин ашиг олоогүй байхад нь бид татвар авах нь зөв үү гэдэг дээр судалгаа хийж байгаа.

Тухайлбал, тусгай зөвшөөрөлтэй аж ахуйн нэгжийн хувьцааг шилжүүллээ гэхэд хөрөнгө оруулалтаа дөнгөж татаж байхад нь татвар аваад байна гэдэг шүүмжлэл бий. Тиймээс энэ асуудал дээр Сангийн яам болон Эдийн засаг, хөгжлийн яамтай хамтраад ажиллаж байна” гэлээ.