Гэртээ тэжээж байсан зэрлэг имжний халдлагад өртсөн хүн амиа алдсан тухай Австралийн орон нутгийн цагдаагийн алба өчигдөр мэдээлжээ.
Энэ нь тус улсад 1936 оноос хойш бүртгэгдсэн анхны тохиолдол болсон байна. Ням гарагт Баруун Австрали мужийн төв Перт хотоос зүүн өмнө зүгт 400 км зайтай оршдог Редмонд суурин дахь гэртээ хүнд бэртсэн 77 настай эрэгтэйг хамаатнууд нь олжээ.
Хохирогч өмнөх өдөр нь имжний халдлагад өртсөн болохыг цагдаа нар тогтоосон байна. Түүнд эрүүл мэндийн анхан шатны тусламж үзүүлэхэд имж саад болсон тул цагдаа нар уг амьтныг буудаж устгажээ.
Гэвч хохирогч удалгүй амьсгал хураасан байна.
Австралийн уугуул амьтдыг гэртээ тэжээх хуулиар хориотой байдаг. Тус улсын баруун бүс нутагт амьдардаг имжний төрөл зүйл 54 кг хүртэл жинтэй, 1.3 метр орчим өндөр байдаг гэнэ.
Энэ амьтны эрэгчин нь заримдаа түрэмгий ааш зан гаргаж, хүмүүс рүү довтлох явдал гардаг байна. Ингэхдээ тэд хоорондоо тулалддаг арга техникийг хэрэглэдэг гэнэ. Имжнүүд хоорондоо тулалдахдаа урд хоёр мөчөөрөө цохилцож, хүчирхэг сүүлэн дээрээ тулгуурлан хойд хоёр хөлөөрөө тийрдэг байна.
Хамгийн сүүлд 1936 онд Австралийн Нью Соут Уэльс мужийн Хиллстон хотын эмнэлэгт имжинд тийрүүлсэн 38 настай Уилльям Крүйкшанк гэдэг хүн нас барж байжээ. Тэрбээр том биетэй имжнээс нохдоо хамгаалах гэж байгаад эрүүгээ хугалуулж, толгойдоо хүнд гэмтэл авсан тухай Австралийн Сидней Морнинг Хералд сонинд мэдээлсэн байна.
Эх сурвалж: Associated Press
