Армени, Азербайжан улсуудын хил дээр гарсан зэвсэгт мөргөлдөөний үеэр хоёр талаас нийтдээ 100 орчим цэрэг алагджээ.
Армени улс 49 цэрэг нь алагдсан тухай мэдээлсэн бол Азербайжаны тал хохирлын хэмжээгээ 50 гэж мэдээлсэн байна.
Олон жилийн турш сөргөөцөлдөж буй хоёр улсын хооронд хоёр дахь томоохон дайн эхлэх эрсдэл ойрхон болсон нь сүүлийн мөргөлдөөнөөс харагдаж байгаа юм.
Мягмар гарагийн өглөө хилийн ойролцоох хэд хэдэн тосгон руу Азербайжаны талаас гал нээсэн тухай Арменийн эрх баригчид мэдээлжээ. Харин Азербайжаны гадаад хэргийн яам газрын мина хилийн орчимд байрлуулж, цэргийн байрлалууд руу нь гал нээж, өдөөн хатгасанд Арменийг буруутгасан байна.
Хоёр улсын хооронд гол зуучлагчийн үүрэг гүйцэтгэдэг ОХУ өчигдөр орой хил дээрх буудалцааныг зогсоож чадсан тухай мэдээлжээ. Гэхдээ буудалцаан бүрэн зогсоогүйг эрх сурвалжууд мэдээлж байна.
Арменийн ерөнхий сайд Никол Пашинян өчигдөр парламентдаа хандаж үг хэлэхдээ “Мөргөлдөөний эрч суларсан ч манай нэгээс хоёр фронт дээр Азербайжаны довтолгоо үргэлжилж байна. Одоогоор бид 49 цэргээ алдаад байна. Харамсалтай нь энэ тоо эцсийнх биш” гэжээ.
2020 онд зургаан долоо хоногийн турш үргэлжилсэн дайны үеэр Азербайжан улс өөрөөсөө салан тусгаарласан Уулын Карабахын бүс нутгийн нэлээд хэсэгт хяналтаа тогтоосон юм. 6,600 гаруй хүний амь үрэгдсэн энэ дайн Оросын талын оролцоотойгоор зогсож байжээ.
АНУ-ын төрийн нарийн бичгийн дарга Энтони Блинкен “Зөрчлийг цэргийн хүчээр шийдвэрлэх арга зам байхгүйг бид эртнээс тодорхой илэрхийлж байгаа. Талуудад дайсагналаа даруй зогсоохыг уриалж байна” гэж мэдэгдсэн байна.
2020 оны дайны дараа ОХУ хоёр мянга орчим энхийг сахиулагчийг Арменид байрлуулж байв. Гэвч Украинд явуулж буй дайны улмаас Оросын хяналт суларсан нь талуудын хооронд дахин мөргөлдөөн гарахад нөлөөлж байна.
Өчигдөр өглөө ОХУ, Арменийн батлан хамгаалахын сайд нар утсаар ярихдаа хил дээрх нөхцөл байдлыг тогтворжуулах арга хэмжээ авахаар тохиролцжээ.
Азербайжаны холбоотон, ивээн тэтгэгч Турк улсын засгийн газар зэвсэгт мөргөлдөөнд Арменийн талыг буруутгасан мэдэгдэл гаргасан байна.
Азербайжаны гадаад хэргийн сайд Жейхун Байрамовтой утсаар ярьсныхаа дараа Туркийн гадаад хэргийн сайд Мэвлют Чавушоглу “Армени улс өдөөн хатгалгаа зогсоож, Азербайжантай энхийн гэрээ байгуулахад анхаарлаа хандуулбал зохино” гэж сошиал хуудсандаа бичсэн юм.
НҮБ-ын аюулгүй байдлын зөвлөлийг даргалж буй Франц улс хоёр улсын асуудлыг хэлэлцэх санал оруулахаар болсноо мэдээлжээ.
Европын Холбооны зөвлөлийн ерөнхийлөгч Чарльз Мишель хоёр улсын төр, засгийн тэргүүнүүдтэй утсаар ярьж, сөргөлдөөнийг өргөжүүлэхээс зайлсхийх боломжийн талаар санал солилцсоноо мэдээлжээ.
Тэрбээр өнгөрсөн сард Армени, Азербайжаны удирдагчидтай Брюссель хотод уулзахдаа хоёр улсын харилцааг хэвийн болгох, хүмүүнлэгийн асуудал, Уулын Карабахын энхийн гэрээний асуудлыг хөндөж байв.
Эх сурвалж: AFP
