Оросын эзлэн түрэмгийллээс саяхан чөлөөлөгдсөн Украины зүүн хязгаарын Изюм хотоос 440 гаруй хүнийг бөөнд нь оршуулсан булш илрүүлснээ орон нутгийн цагдаагийн газар өчигдөр мэдээлжээ.
Илэрсэн цогцос бүрийг шинжилж, үхлийн шалтгааныг тогтоохоор ажиллаж эхэлснээ Харьков мужийн цагдаагийн ахлах мөрдөгч Сергей Болвинов хэвлэлд ярьсан байна. Хохирогчдын зарим нь их бууны суманд, агаарын цохилтод амиа алдсан шинж тэмдгүүд урьдчилсан байдлаар ажиглагдаж байгааг тэр бас хэлсэн юм.
Украины ерөнхийлөгч Володимир Зеленский үүнийг Буча тосгонд Оросуудын үйлдсэн аллагатай зүйрлэжээ. Дайны эхэн үед нийслэл Киев хотын ойролцоох Буча тосгонд энгийн номхон иргэдийг олноор хядсан аллагыг илрүүлж байсан юм.
“Оросууд орхиж явсан газар бүрдээ үхэл хагацал үлдээж байна. Тэд үүнийхээ төлөө хариуцлага хүлээх ёстой” гэж Зеленский өчигдөр хийсэн ээлжит мэдэгдлийнхээ үеэр ярьжээ.
Харин ОХУ-ын албаныхан цэргүүд нь энгийн иргэдийн амь насанд санаатай халдсан, дайны гэмт хэрэг үйлдсэн гэх мэдээллийг дахин дахин няцаасаар байгаа юм.
Эх сурвалж: Reuters