Английн хөлбөмөгийн шигшээ багийн ахлагч асан 47 настай Дэвид Бекхэм хатан хаантай салах ёс гүйцэтгэхийн тулд хүмүүсийн урт дараалалд 12 цаг хүлээсэн байна.
Тэрбээр Уэстминстерийн ордонд байрлуулсан хатан хаан Элизабетын шарилд хүндэтгэл үзүүлэхээр олон километр урт дараалал үүсгэсэн олон мянган хүний дунд байжээ.
Бекхэм 2003 онд үндэснийхээ хөлбөмбөгийн спортод үнэтэй хувь нэмэр оруулсныхаа төлөө Британийн Эзэнт Гүрний одонг хатан хаанаас хүртэж байсан юм.
“Энд зогсоод хүмүүсийн түүх дурсамжуудыг сонсоход үнэхээр таатай байлаа. Би одон авахдаа намайг хаант засаглалын үнэнч дэмжигч болгож хүмүүжүүлсэн өвөө, эмээгээ гэргийн хамт дагуулан очиж байв. Шагналаа авах үедээ би хатан хааны асуултад хариулж, хэсэгхэн хугацаанд ярилцсан нь миний амьдралын хамгийн азтай мөчүүдийн нэг байлаа” гэж Бекхэм дурссан байна.
Тэрбээр Баасан гарагийн шөнийн 2:00 цагаас эхлэн урт дараалалд дугаарлан зогсохдоо ойр байсан хүмүүстэйгээ чихэр, амттан хуваалцаж, кофе уусан гэнэ.
“Шөнийн 2:00 цагт ирвэл арай цөөн хүнтэй байх болов уу гэж би бодсон нь эндүүрэл байлаа” гэж Бекхэм энэ үеэр ярьсан юм.
Эх сурвалж: BBC
