Украинд явуулж буй “цэргийн тусгай ажиллагаа”-ндаа оролцох хүсэлтэй эрэгтэйчүүдийг элсүүлэх зорилготой явуулын цэгийг Оросын эрх баригчид ажиллуулж эхэлжээ.
Ачааны автомашин ашигласан явуулын цэг Бямба гарагт Оросын өмнөд бүсийн Ростов хотод ажиллаж байгааг хэвлэлүүд сурвалжилсан байна.
Явуулын цэгийн дэргэд өвч зэвсэглэсэн хоёр хүн иргэдэд танилцуулах хэвлэмэл материал тарааж, өмссөн хувцас, зүүсэн зэвсэг техникээ үзүүлж байжээ.
Танилцуулах материал нь “Гэрээгээр цэрэгт алба хаах нь жинхэнэ эр хүний сонголт” гэсэн уриа гарчигтай юм байна.
Украинд гэрээгээр явах эрчүүд 18-60 насны, ядаж бүрэн дунд боловсролтой байх шаардлага тавьж байгаа ажээ. “Эх оронч сэтгэлгээтэй иргэд цэргийн тусгай ажиллагаанд явах 3-6 сарын гэрээ байгуулж байна” гэж Ростов дахь явуулын цэгийг ажиллуулж буй хошууч Сергей Ардашев ярьсан байна.
Гэрээгээр Украин явах иргэд сардаа хамгийн бага нь 160,000 рублийн ($2,700) цалин авах ажээ. Энэ нь ОХУ-ын цалингийн дунджаас бараг гурав дахин өндөр тоо юм. Украинд явах хүсэлт гаргагчдаас сэтгэцийн болон биеийн эрүүл мэндийн шалгалт авсны дараа тэнцвэл цэргийн анги нэгжид хуваарилах ажээ.
Эх сурвалж: Reuters