“Путиний тогооч” хочтой Оросын олигархи Евгений Пригожин өчигдөр АНУ-ын улс төрийн сонгуульд нөлөөлөх ажлыг зохион байгуулж байснаа анх удаа хүлээн зөвшөөрчээ.

Явуулын ресторан буюу катерингийн бизнес эзэмшдэг, үүгээрээ Кремлийн элитүүдэд үйлчилдэг тул тэр “Путиний тогооч” хэмээх алдартай болсон юм.

АНУ-д конгрессын дунд хугацааны сонгуулийн санал хураалт эхлэхийн өмнөх өдөр тэр “Бид сонгуульд хөндлөнгөөс нөлөөлж байсан, нөлөөлж байгаа, нөлөөлөх ч болно. Болгоомжтой, мэс заслын мэт нарийн аргаар, өөрийн гэсэн арга техникээр” гэж сошиал хуудсандаа бичжээ.

Украины дайнд өөрийн байгуулсан Вагнер Группийн хөлсний цэргүүдээр оролцож байгаа 61 настай Пригожиний Кремль дэх нөлөө сүүлийн үед маш их нэмэгдэж байгаа гэгддэг.

Есдүгээр сард тэр бас анх удаа Вагнер Группийн эзэмшигч гэдгээ ил тод хүлээн зөвшөөрсөн юм.

Вагнер Группийн элсүүлсэн хөлсний цэргүүд Украинаас гадна Сири болон Африкийн орнуудад Оросын эрх ашгийг хамгаалах ажиллагаанд оролцдог.

Саяхан Оросын шоронд цэрэг элсүүлж буй Пригожиний дүрс бичлэг интернэт ертөнцөд тарж байв. 2018 онд АНУ-ын шүүх Пригожин тэргүүтэй Оросын иргэдийг болон гурван компанийг 2016 оны ерөнхийлөгчийн сонгуулийн үр дүнд нөлөөлөх ажиллагаа зохион байгуулсан хэрэгт буруутгаж байсан юм.

Энэ оны долдугаар сард АНУ-ын төрийн департамент Пригожиний Санкт-Петербург хотод ажиллуулдаг тролл фармын Интернэт Судалгааны Агентлаг нэртэй байгууллагын талаар мэдээлэл өгсөн хүнд $10 саяын шагнал амлаж байв.

Пригожин өчигдрийг хүртэл АНУ-ын сонгуулийн үйл явцад нөлөөлөх оролдлого явуулж байснаа эрс үгүйсгэдэг байжээ.

Анх гудамжинд хот дог зардаг байсан тэрбээр Санкт-Петербург хотод тансаг ресторан нээсэн нь Путиний анхаарлыг татаж байсан гэдэг.

Путин тус ресторанд Францын ерөнхийлөгч Жак Ширактай оройн зоог барьж байжээ. 2010 оноос Пригожиний бизнес улам өргөжиж, төрийн банкнаас их хэмжээний зээл авч, дунд сургуулиудад үдийн хоол бэлтгэн нийлүүлэх үйлдвэрээ нээсэн байна. Уг үйлдвэрийн нээлтэд Путин оролцож байжээ.

Тухайлбал Москва хотын дунд сургуулиудад үдийн хоол нийлүүлэх олон саяын гэрээг Пригожиний Конкорд компани байгуулж байв. Үүнээс гадна Кремлийн арга хэмжээнүүдэд явуулын ресторанаар үйлчлэх, ОХУ-ын армид хоол хүнс нийлүүлэх томоохон гэрээнүүдийг байгуулж байжээ.

2014 онд Украины дорнод хэсэгт салан тусгаарлах дайн эхлэхэд Пригожин хувийн батлан хамгаалах компаниа байгуулсан байна.

Эх сурвалж: Associated Press