Даваа гарагт Индонез улсын Өрнөд Жава мужийн нутагт 5.6 магнитудын хүчтэй газар хөдөлсний улмаас 162 хүн амиа алдаж, 326 хүн гэмтжээ.
Газар хөдлөлтийн төв цэг нийслэл Жакарта хотоос зүүн өмнө зүгт 75 км зайтай оршдог Сианжур хотын ойролцоо байсан байна.
Энэ бүс нутагт 2.5 сая хүн оршин суудаг юм.
Гамшгийн бүсэд аврах ажиллагаа үргэлжилж байгаа ба хохирлын хэмжээ өсөх магадлал өндөр байна.
Энэ удаагийн газар хөдлөлтөөр 2,200 гаруй орон байр сүйдэж, 5,300 орчим хүнийг нүүлгэн шилжүүлжээ.
Индонез улс нь Номхон далайг тойрсон "Галт цагариг” гэгддэг галт уул, газар хөдлөлтийн өндөр идэвхжилтэй бүсэд оршдог.
Газар хөдлөлтийн дараа бага хэмжээний 88 чичиргээ бүртгэгдсэн тухай албаныхан мэдээлжээ.
Ойрын үед усархаг бороо орсны улмаас хөрсний гулгалт үүсэх эрсдэл нэмэгдэж буйг бас анхааруулсан байна.
Газар хөдлөлтийн үеэр нийслэл Жакарта хотод байшин барилгууд ганхаж байжээ.
2004 онд Суматра аралд 9.1 магнитудын хүчтэй газар хөдөлсний дараа Энэтхэгийн далайн эрэг дагуу үүссэн цүнамид бүс нутгийн 14 улс өртөж, 226,000 орчим хүн амиа алдаж байв. Үүний тал гаруй нь Индонез улсад бүртгэгдэж байжээ.
Эх сурвалж: Reuters