Умард Солонгосоос ОХУ-д илгээсэн зэр зэвсгийг хувийн батлан хамгаалалтын компани Вагнер Групп хүлээж авсныг АНУ-ын ерөнхийлөгчийн Цагаан ордноос өчигдөр мэдээлжээ.

“Украин дахь байлдааны ажиллагаагаа дэмжих зорилгоор Вагнер Групп дэлхий даяар зэр зэвсэг хайж байна. Умард Солонгосын илгээсэн эхний багц зэвсгийг Вагнер хүлээн авч, төлбөрийг нь төлснийг бид баталж байна. Өнгөрсөн сард Умард Солонгосын дэглэм пуужин, их бууны сумнуудыг ОХУ-д илгээсэн юм” гэж Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби өчигдөр хэлсэн байна.

Вагнер Групп нь Кремлийн эрх ашгийг хилийн чанадад хамгаалах зорилгоор 2014 онд Крымийн хойгийг ОХУ өөртөө нэгтгэсний дараа байгуулагдаж байжээ.

Одоо тус группийн 50,000 орчим хөлсний цэрэг Украинд байлдаж байгаа гэж АНУ-ын албаныхан үздэг. Эдгээрийн 10,000 нь хөлсний гэрээт цэргүүд, 40,000 нь Оросын шоронгуудаас элсүүлсэн сайн дурынхан гэнэ.

Тус групп бас Сири болон Африкийн Ливи, Мали, Төв Африкийн БНУ зэрэг орнуудад байлдааны ажиллагаа явуулдаг.

Арваннэгдүгээр сард анх Умард Солонгосоос ОХУ-д зэвсэг нийлүүлэх гэж байгаа тухай Цагаан ордноос мэдээлэхэд Пёньяны эрх баригчид үгүйсгэж байв.

Украины дайнд гол үүрэгтэй оролцож буй Вагнер Группийн үүсгэн байгуулагч Евгений Пригожин одоо Кремльд маш их нөлөөтэй хүн болсон гэх яриа гараад байгаа.

“Путиний тогооч” хочтой тэрбээр анх нийтийн хоолны салбарт бизнесээ эхэлж, сүүлдээ Кремлийн гол бэлтгэн нийлүүлэгч болсон гэдэг.

АНУ-ын засаг захиргаа Вагнер Групп болон Евгений Пригожинийг эдийн засгийн хоригийн хар жагсаалтдаа оруулсан байгаа. Өчигдрийн мэдэгдэлдээ Кирби одоо Вагнер Групп сар бүр доод тал нь $100 саяыг Украин дахь үйл ажиллагаандаа зарцуулж байгаа ч хүн хүчний хомсдолтой тулгараад буй тухай мэдээлжээ.

Эх сурвалж: Reuters