Даваа гарагт Умард Солонгосын талаас таван ширхэг дрон хил давж ирсэн тухай Өмнөд Солонгосын арми мэдээлжээ.
Тэдгээрийн нэг нь нийслэл Сөүл хотын хойд захад хүрээд буцсан байна. Өмнөд Солонгосын арми хариуд нь байлдааны нисдэг тэрэгнүүд хөөргөж, дронууд руу нисдэг тэрэгнээс гал нээсэн ч устгаж чадаагүй гэнэ.
Агаарын хил зөрчсөн бүх дрон буцаж хил давсан гэж үзэж байгаагаа Сөүлийн эрх баригчид мэдээлжээ. Хариу арга хэмжээнд оролцсон Өмнөд Солонгосын армийн KA-1 байлдааны хөнгөн нисэх онгоц хөөрснийхөө дараа осолдож, хоёр нисгэгч нь шүхрээр эсэн мэнд газардаж чадсан байна.
Ажиллагааны үеэр Инчон, Гимпо буудлуудаас нисэх онгоц хөөргөх, газардуулахыг нэг цагийн турш зогсоожээ.
Хамгийн сүүлд 2017 оны зургаадугаар сард Умард Солонгосын дрон хоёр улсын хилийг зөрчиж байв.
Энэ удаагийн хил зөрчсөн үйлдлийг Пёньяны дэглэмийн ил тод өдөөн хатгалга гэж үзэж байгаагаа Өмнөд Солонгосын батлан хамгаалах яамны төлөөлөгч мэдэгджээ. Өдөөн хатгалгын хариуд хил орчмын цэргийн байгууламжуудын гэрэл зургийг авах зорилгоор тагнуулын нисэх онгоцнуудаа Умардын нутаг руу илгээсэн тухай бас мэдээлсэн байна.
Эх сурвалж: BBC
