АНУ-ын Лас-Вегас хотод энэ долоо хоногт эхэлсэн CES (Consumer Electronics Show) үзэсгэлэн дээр Японы Sony, Honda компаниуд цахилгаан хөдөлгүүрт автомашины хамтарсан шинэ брэндээ танилцуулжээ.
“Afeela” нэртэй шинэ брэндийнхээ эхний бүтээгдэхүүний туршилтын загварыг энэ үеэр бас үзүүлсэн байна.
Туршилтын дөрвөн хаалгатай седан загварыг тайзан дээр жолоодож гарч ирсэн Sony компанийн гүйцэтгэх захирал Кеничиро Ёшида автомат жолоодлоготой, “явдаг энтертайнмэнт” орон зайг бүтээх нь тус компанийн гол зорилго болохыг тунхаглажээ.
Afeela брэндийн эхний бүтээгдэхүүний захиалга 2025 оны нэгдүгээр хагаст эхэлж, хоёрдугаар хагаст зах зээлд нийлүүлж эхлэх гэнэ.
Туршилтын загвар нь хөдөлгөөний аюулгүй байдлыг хангах зорилготой 45 камер, мэдрэгчийг дотор болон гадна талдаа байрлуулсан юм байна.
Төсөлд Sony компани оролцож байгаагийн хувьд автомашины энтертайнмент системийг хамгийн өндөр түвшинд хүргэх гэнэ.
Тухайлбал 3D компьютер тоглоомын графикт ашигладаг Epic Games-ийн Unreal Engine системийг нэвтрүүлснээр энтертайнментаас гадна хөдөлгөөний аюулгүй байдал, харилцаа холбоо зэрэгтэй холбоотой мэдээллүүдийг дүрсжүүлэх юм байна.
Эх сурвалж: Tech Crunch