Дэлхийн хамгийн том түргэн хоолны сүлжээ МакДональдсын гүйцэтгэх захирал асан Стив Истербрүк удирдах түвшний эмэгтэй ажилтантайгаа нууцаар дотно харилцаатай болсон нь илэрсний дараа 2019 онд албан тушаалаасаа чөлөөлөгдөж байсан юм.
Харин өчигдөр АНУ-ын Үнэт Цаасны Арилжааны Хороо түүнийг $400,000-аар торгох шийдвэр гаргажээ. Тус зохицуулах байгууллага 55 настай Британийн харьяат Истербрүкийг “хөдөлмөрийн гэрээгээ дуусгах болсон нөхцөл шалтгааны талаар хөрөнгө оруулагчдыг хуурч, төөрөгдүүлсэн мэдэгдэл гаргасан” гэх үндэслэлээр ийнхүү шийтгэсэн байна.
Тухайн үед Истербрүк ажлаас гарахдаа гэрээнийхээ дагуу МакДональдсаас $40 гаруй саяын тэтгэмж авч байжээ.
“Корпорацын албан тушаалтнууд хувийн нэр хүнд, хэтэвчин дэх мөнгөтэй нь холбоотой дотоод асуудал сөхөгдөхөд хөрөнгө оруулагчдын өмнө ил тод, шударга, нээлттэй байх үндсэн үүргээ мартдаг. Компанийн дотоод хяналт шалгалтын явцад илэрсэн өөрийнхөө буруутай үйлдлийн цар хүрээг нуун дарагдуулах замаар Истербрүк хөрөнгө оруулагчдын итгэлийг эвдэж, төөрөгдүүлсэн байна” гэж Үнэт Цаасны Арилжааны Хорооны хууль зүйн албаны захирал Гүрбир Гревал мэдэгдсэн байна.
Мөнгөн торгуулиас гадна Истербрүк таван жил удирдах албан тушаал хаших эрхээ хасуулжээ.
Эх сурвалж: The Guardian