Хятад улс Австралийн нүүрсний экспортод тавиад байсан албан бус хоригоо цуцалж эхэлсэн тухай мэдээ энэ долоо хоногт цацагдсан юм.
Өчигдөр Хятадын албаны хүн энэ мэдээллийг баталжээ. Австралид суугаа БНХАУ-ын элчин сайд Шиао Чиань өчигдөр Канберра хотод сэтгүүлчидтэй уулзахдаа нүүрсний экспортын ямар нэг албан ёсны хориг үйлчлээгүй байгаа, нүүрсийг худалдаж авах эсэх нь Хятадын компаниудын шийдэх асуудал гэж тайлбарласан байна.
Коронавирусийн уг гарлыг олон улсын хэмжээнд судлах уриалгад Австрали улс нэгдсэний хариуд 2020 оны дөрөвдүгээр сараас эхлэн Хятадын засгийн газар тус улсаас зарим бараа бүтээгдэхүүнийг импортлохоо зогсоож байв.
Үүнд нүүрснээс гадна зарим төрлийн үр тариа, далайн хүнс, дарс зэрэг бүтээгдэхүүнүүд багтаж байжээ.
2021 онд АНУ-ын төрийн нарийн бичгийн дарга Энтони Блинкен эдийн засгийн хориг арга хэмжээгээр Австрали улсыг шийтгэж буй Бээжингийн бодлогыг шүүмжилж, ийм ааш авир Вашингтонтой харилцах харилцааг сайжруулахад нь тус болохгүйг анхааруулж байв.
Харин өнгөрсөн онд Австралид шинэ засгийн газар байгуулагдаж, Энтони Албаниз ерөнхий сайдаар томилогдсоны дараа Хятадтай харилцах харилцаанд нь эерэг өөрчлөлтүүд гарч эхэлсэн юм.
Арван нэгдүгээр сард Индонезын Бали аралд болсон Их 20-ын чуулганы үеэр Хятадын төрийн тэргүүн Ши Жиньпин, Австралийн ерөнхий сайд Энтони Албаниз нар уулзсан юм.
Өмнө нь тарсан мэдээллээр бол Хятадын засгийн газар төрийн өмчит компаниуддаа Австралиас нүүрс авахыг зөвшөөрсөн байна.
Австралийн нүүрс олборлогчид ч Хятадын талаас нийлүүлэх хүсэлтүүд хүлээж авч эхэлснээ мэдээлжээ.
Эх сурвалж: Reuters
