Ирэх сард Оросын эрх баригчид Олон Улсын Сансрын Станцад (ОУСС) гацаад байгаа гурван сансрын нисгэгчийг дэлхийд буцааж авчрах хөлгийг хөөргөхөөр болжээ.
Тэдгээр сансрын нисгэгчдийг дэлхийд буцаах байсан хөлөг солирт цохиулсны улмаас гэмтсэн юм.
Одоо ОУСС-д залгагдсан байгаа Союз МС-22 хөлөгт цоорхой гарч, битүүмжлэл алдагдсан нь өнгөрсөн сард тодорхой болж байжээ.
Тухайн үед Роскосмос солирын гэмтэл сансрын нисгэгчдийн аюулгүй байдалд нөлөөлөхгүй гэж мэдэгдэж байв. Гэхдээ тэднийг дэлхийд найдвартай буцааж авчрах асуудал эргэлзээтэй хэвээр байлаа.
Одоо ОУСС-д АНУ-ын SpaceX компанийн Crew Dragon хөлөг бас залгаатай байгаа. Гэхдээ уг хөлөг дөрвөн суудалтай юм. Харин ОУСС-д нийт долоон сансрын нисгэгч байрлаж байгаа.
Иймээс Роскосмос гуравдугаар сард хөөргөх төлөвлөгөөтэй байсан Союз МС-23 хөлгөө хоёрдугаар сард хөөргөж, Оросын Сергей Прокопьев, Дмитрий Петелин, АНУ-ын Франциско Рубио нарыг дэлхийд буцааж авчрахаар болжээ.
МС-23 гурван сансрын нисгэгчийг тойрог замд хүргэх анхны төлөвлөгөөтэй байсан бол энэ удаа төлөвлөгөөгөө өөрчилж хоосон хөөрөхөөр болсон байна.
Гэмтсэн МС-22 хөлөг сансрын нисгэгчдийг татаж авсны дараа дэлхий рүү хоосон буцах гэнэ.
Дэлхийн тойрог замд их хэмжээтэй байдаг элсний ширхгийн хэмжээтэй бичил солирууд сансрын хөлгийг мөргөвөл ноцтой гэмтэл учруулдаг.
Тэд ойролцоогоор 27,400 км/цаг буюу бууны сумнаас ч илүү хурдтай нисэж байдаг байна.
Союз хөлгийг мөргөсөн солир диаметр нь 1 мм хэмжээтэй цоорхой үүсгэснийг Роскосмос мэдээлж байв.
Бичил солироос гадна хүний өөрийнх нь тойрог замд үүсгэсэн хог хаягдал бас сансрын хөлгийг гэмтээх тохиолдол байдаг.
Сансар судлал бол Украины дайнтай холбоотойгоор муудаагүй байгаа Орос-Америкийн хамтын ажиллагааны цөөн салбаруудын нэг юм.
Одоо тойрог замд ашиглагдаж байгаа ОУСС-ыг 1998 онд анх энэ хоёр улс голлон суурийг нь тавьж байжээ. Хуучирсан энэхүү станцыг 2031 онд ашиглалтаас гаргаж, Номхон далайд унагах төлөвлөгөөтэй байгаа.
Шинэ станцыг байгуулах өрсөлдөөн одоо АНУ, Хятадын хооронд өрнөж эхлээд байна. Хятадын тал 2021 онд өөрийн хараат бус тойрог замын станцыг байгуулах хөтөлбөрийг эхлүүлж, одоо 70 тонн жинтэй Тянгон станцыг ашиглалтад оруулаад байгаа.
“Тэнгэрийн ордон” нэртэй уг станцыг хамгийн богинодоо 10 жил ашиглана гэж үзэж байна.
Эх сурвалж: The Guardian