Малайз-Хятад гаралтай жүжигчин Мишель Иео өчигдөр Алтан бөмбөрцөг наадмаас шилдэг жүжигчний шагналыг хүртлээ.
Өдгөө 60 настай Мишель Иео "Everything everytime all at once" кинонд бүтээсэн дүрээрээ Мюзикл/Инээдмийн киноны шилдэг жүжигчин номинацид нэр дэвшиж, Анна Тэйлор Жой, Маргот Робби, Лесли Манвилл нарыг ардаа орхин, уг наадмаас анхны шагналаа хүртсэн юм. Ингэснээр уг номинацид шилдгээр тодорсон Ази гаралтай хоёр дахь жүжигчин болов.
Түүний энэхүү амжилтыг Малайзын Харилцаа холбооны сайд Фахмил Фадзил "Манай улсын хувьд ихээхэн нэр төрийн хэрэг" гэж тодорхойлоод "Дараагийнх нь Оскар" хэмээн твиттертээ бичжээ.
Мөн Хонконгийн соёл урлаг хариуцсан нарийн бичгийн дарга Кевин Юнг "Кино урлагийн салбарт Хонконг жүжигчдийн гялалзсан амжилт үргэлжилсээр буй нь бидэнд тун их урам зориг өгч байна" гэжээ.
Тэрбээр 1980-аад оны үед Хонконгод уран бүтээлийн гараагаа эхлүүлж, Холливүүдийг зорьжээ.
Мишель Иео карьерынхаа эхэн үед буюу Хонконг ажиллах үедээ адал явдалт кинонууд дүр бүтээж, танигдсан. Харин алдарт Жэймс Бонд цувралын "Tomorrow never dies", "Crouching Tiger, Hidden Dragon" зэрэг кинонд тоглосноороо барууны үзэгчдэд алдаршжээ.
Түүний сүүлийн үеийн кинонуудаас дурдвал, "Crazy rich asians", "Shang-chi and the Legend of the Ten rings" зэргийг нэрлэж болох юм.
Мишель Иео Алтан бөмбөрцөг кино наадмын дараа сэтгүүлчдэд өгсөн ярилцлагадаа "Олон талт байхын чухлыг ойлгодог, улс үндэстнүүдийн соёлын онцлог шинж, түүхийг уран бүтээлээрээ зөвөөр дамжуулан үзүүлдэг кино бүтээгч олон болж байгаа нь сайн хэрэг. Энэ бол үзэгчдийн хүсэл, хэрэгцээ юм. Бид томоохон өөрчлөлтийн явцад байна. Өнөөдөр би энд зогсож байгаадаа тун их баяртай. Учир нь юмс өөрчлөгдсөөр байгаа" хэмээжээ.
Эх сурвалж: BBC