Шинэ зэвсгийн анхны амжилттай туршилтууд Их Британид болсон: агаарын байг хүчтэй лазераар цохив.
Мэргэжилтнүүд энэхүү лазер нь агаарын довтолгооноос хамгаалах систем дэх пуужингийн хямд хувилбар болж чадна гэж үзэж байна. Жишээлбэл, нисгэгчгүй онгоцыг устгахад ашиглаж болно.
Их Британийн Батлан хамгаалах яамны мэдээлснээр "DragonFire" нэртэй зэвсэг нь маш нарийвчлалтай тул нэг километрийн зайд байгаа нэг фунтын зоосыг онох чадалтай.
Лазер зэвсгийн системийг тус улсын Батлан хамгаалахын шинжлэх ухаан, технологийн лаборатори /Dstl/ болон үйлдвэрлэлийн түншүүдтэй хамтран боловсруулж байна. Батлан хамгаалах яам Шотландын Хебрид дэх туршилтын талбай дээр хийсэн энэхүү туршилтыг тухайн технологийг ашиглалтад оруулах чухал алхам гэж нэрлэжээ.
Их Британийн Батлан хамгаалахын сайд Грант Шаппс хэлэхдээ, энэхүү технологи нь өндөр үнэтэй суманд найдах явдлыг багасгаж, хохирлын эрсдэлийг бууруулна.
Арми болон Хааны Тэнгисийн цэргийн хүчин хоёулаа агаарын довтолгооноос хамгаалах системдээ энэхүү шинэ технологийг ашиглах талаар хэлэлцэж байна гэж Батлан хамгаалах яам мэдэгдэв.
Цэргийн тэргүүлэгч гүрнүүд өнгөрсөн зууны дунд үеэс лазерын зэвсгийг бүтээж эхэлсэн. АНУ-ын Тэнгисийн цэргийн хүчин аль хэдийн хэд хэдэн эсминец /хөнгөн усан онгоц/ дээр лазерын систем суурилуулиад байна. Гэсэн хэдий ч, тухайлбал, сүүлийн хэдэн долоо хоногт тэд Улаан тэнгис дэх Хути нарын нисгэгчгүй онгоцыг лазераар биш, харин пуужингаар харвасан.
Үүний зэрэгцээ, агаарын довтолгооноос хамгаалах пуужингууд нь ихэвчлэн нисгэгчгүй онгоцноос хамаагүй илүү үнэтэй байдаг. Пуужингууд нь хэдэн зуун мянга, бүр сая гаруй долларын үнэтэй байдаг бол харьцангуй энгийн камиказе нисгэгчгүй онгоцууд хэдэн арван мянгын үнэтэй байдаг.
Батлан хамгаалах яамны мэдээлснээр "DragonFire" систем нь 10 секундын турш ажиллахад ердийн гэр ахуйн халаагуур нэг цагт зарцуулдагтай адил эрчим хүч зарцуулдаг. Ерөнхийдөө системийг ажиллуулахын тулд нэг цохилт тутамд 10 фунтээс бага зардал гардаг.
"Эдгээр туршилтууд нь эрчим хүчний зэвсэгтэй холбоотой аюул заналхийллийг ойлгоход асар том алхам хийх боломжийг бидэнд олгож байна" гэж Dstl-ийн гүйцэтгэх захирал Пол Холлиншэд хэлэв.
Лазер зэвсгийн бүтээх ажиллагаа нь Украин, Оросын хоорондох мөргөлдөөнд нисгэгчгүй онгоцыг ашиглах нь нэмэгдэж байгаа үед хэрэгжиж байна.
Эх сурвалж: ВВС
