Молдова улсаас салан тусгаарласан Транснистрийн бүс нутгийн Оросын талыг баримтлагч удирдлага өчигдөр Москвагаас “хамгаалалт” хүссэн нь мөргөлдөөний бас нэг голомт бий болох эрсдэлийг нэмэгдүүллээ.

Зөвлөлт Холбоот Улс задарсны дараа Оросын дэмжлэгтэй салан тусгаарлагчдын хяналтад үлдсэн энэ нарийн зурвас газрыг олон улсын хэмжээнд Молдовын нутаг дэвсгэрийн нэг хэсэг гэж үздэг. Тус бүс нутгийн 470,000 орчим оршин суугчийн дийлэнх нь орос үндэстнүүд юм.

Лхагва гарагт түүхэндээ долоо дахь удаагаа хуралдсан Транснистрийн парламент Молдова улсын дарамт шахалтаас “хамгаалах” хүсэлт Москвад илгээхийг дэмжсэн тогтоол баталжээ.

Кишинёв дахь Молдовын засгийн газар Транснистрийн гол импортыг хааж, “эдийн засгийн дайн” явуулж байгаа тухай уг тогтоолд дурдсан байна.

Молдовын засгийн газрын шадар сайд Олег Серебрян “Тирасполиос гаргасан суртал нэвтрүүлгийн чанартай мэдэгдлийг манай засгийн газар няцааж байна. Манай бүх ард иргэдэд ашигтай Европын Холбоотой хамтран хэрэгжүүлж буй энх тайван, аюулгүй байдал, эдийн засгийн интеграцчлалын бодлогын үр шимийг Транснистрийн бүс нутаг хүртэж байгаа” гэж Телеграм хуудсандаа бичжээ.

Тирасполь нь Транснистрийн бүс нутгийн төв юм.

Тэгвэл ОХУ-ын гадаад хэргийн яамны төлөөлөгч “Манай эх орон нэгтнүүд болох Приднестровийн оршин суугчдын эрх ашгийг хамгаалах нь бидний тэргүүлэх чиглэлүүдийн нэг юм” гэж хэлснийг тус улсын төв хэвлэл мэдээлсэн байна.

ОХУ-ын ерөнхийлөгч Путин өөрийн хууль тогтоох дээд байгууллагад жил тутмын илтгэлээ тавих өдрийн өмнө ийм тогтоол гарсан нь анхаарал татаж байна.

2006 онд Транснистрийн парламент ОХУ-д нэгдэх асуудлаар бүх нийтийн санал хураалт зохион байгуулах шийдвэр гаргаж байв. 2022 оны хоёрдугаар сард Украины дайн эхлэхийн өмнөхөн Донбассын салан тусгаарлагчид бас Оросоос “хамгаалалт” хүсэж байсан юм.

Гэхдээ Кишинёвын эрх баригчид үүнийг тийм ноцтой зүйл биш, дуулиан дэгдээх ээлжит оролдлого гэж үзэж байгаа юм байна.

Оросын цэрэг Украинд халдан довтолсны дараа Москвагийн эрх баригчид Одессын чиглэлд довтлохоор Транснистрийн бүс нутагт шинэ фронт нээж болзошгүй гэсэн айдас бий болж байв.

2022 онд энэ бүс нутагт үл мэдэгдэх дэлбэрэлтүүд болоход бас үүнийг дайнд татан оруулах зорилготой Оросын явуулсан ажиллагаа байж болзошгүй гэсэн таамаг яригдаж байлаа.

2023 оны гуравдугаар сард Транснистрийн захиргаа удирдагчийнх нь амь насанд халдах оролдлогыг Украины талаас явуулсан тухай мэдэгдэхэд Киевийн эрх баригчид үүнийг нь няцааж байжээ.

Одоо Транснистрийн бүс нутагт Оросын 1,500 орчим цэрэг байнга байрладаг.

ОХУ энэ бүс нутгийг үнэгүй байгалийн хийгээр хангах зэргээр дэмжих бодлого явуулдаг байсан нь Украины дайны улмаас хязгаарлагдаад байгаа юм.

Эх сурвалж: AFP