АНУ болон Японы эрх баригчид Украинд үзүүлэх тусламжаа нэмэгдүүлэх зорилгоор батлан хамгаалах салбарын шинэ хамтын ажиллагааг эхлүүлэхээр хэлэлцэж буй тухай Ёмиури сонин Ням гарагт мэдээлжээ.

Дөрөвдүгээр сарын 10-нд Вашингтонд болох АНУ-ын ерөнхийлөгч Жо Байден, Японы ерөнхий сайд Фүмио Кишида нарын уулзалтын үеэр уг асуудлыг эцэслэн шийдвэрлэж магадгүй тухай эх сурвалж мэдээлсэн байна.

Дээд хэмжээний уулзалтын гол сэдэв нь АНУ-ын зэвсгийн нөөцийг нэмэгдүүлэхэд Япон улс туслах арга замын тухай асуудал байх гэнэ.

Оросын эзлэн түрэмгийллийн эсрэг Украины тэмцлийг дэмжих Вашингтоны амлалтыг биелүүлэхийн тулд Америкийн зэвсэг үйлдвэрлэгчид шаргуу ажиллаж байгаа.

Япон улсын хувьд дэлхийн хоёрдугаар дайны дараа энхийг эрхэмлэгч үндсэн хуультай болсон бөгөөд ийм шалтгааны улмаас Украинд зөвхөн хүмүүнлэгийн болон санхүүгийн тусламж үзүүлж байгаа юм.

Хэрвээ Токиогийн эрх баригчид энэ хоригоо цуцалбал богино хугацаандаа АНУ, Европын орнуудын Украинд зэр зэвсэг нийлүүлэх хурдыг нэмэгдүүлж, урт хугацаандаа Япон улсыг зэвсэг экспортлогч болгох боломжтой.

Өнгөрсөн оны арванхоёрдугаар сард Японы засгийн газар өөрийн нөөцөд байгаа зэвсгийг үйлдвэрлэгч улсад нь буцаан зарах боломжийг нээсэн юм. Ингэснээр Патриот агаарын довтолгооноос хамгаалах системийг АНУ-д нийлүүлж, цааш нь Украинд ийм төрлийн зэвсэг нийлүүлэх боломжийг нэмэгдүүлж байв.

Ямартай ч Байден, Кишида нарын уулзалтын гол зорилго нь хоёр улсын батлан хамгаалах салбарын хангамж, нийлүүлэлтийн сүлжээг сайжруулах бололтой.

Үүнээс гадна Японы компаниудын засвар үйлчилгээ үзүүлдэг АНУ-ын цэргийн зэвсэг, техникийн хамрах хүрээг өргөжүүлэх асуудлыг хэлэлцэх тухай эх сурвалж мэдээлжээ.

Ингэвэл АНУ-д зэр зэвсгийнхээ засвар үйлчилгээний хурдыг нэмэгдүүлэх, Японд батлан хамгаалах салбарын үйлдвэрлэл, технологио сайжруулах боломж нээгдэх гэнэ.

Нөгөө талаас сонгууль ойртож байгаа энэ цаг үед Америкчуудын ажил бизнесийг Японд шилжүүлэх нь Байдены хувьд эрсдэлтэй алхам болно гэж ажиглагчид үзэж байна.

Эх сурвалж: Reuters