Зальтай, залхай улс төрчид залуу хүний алдаан дээр зай завсаргүй ажилласаар Хэнтийд нөхөн сонгууль зарлуулах болгов.Тэд өөрсдөө авгай хүүхэнтэй ороцолдож үзээгүй гэвэл тэрэн шиг худлаа юм байхгүй нь мэдээж. Д.Гантулгаас ялгаатай нь муу санааны үүр болсон учир муухай ул мөрөө үлдээдэггүй тул баригддаггүй байхгүй юу. Нийгэм даяаар тархаад байгаа хочтой холбон хэлэхэд “бандаашаа өмсчихөөд л “ юү ч болоогүй юм шиг гараад явчихдаг байж. Иймэрхүү л дүр зураг бууж байна.
Хэнтийн сонгуулийн сургаар улс төрд хөдөлгөөн гараад удсан. Үхсэн буур амилж, амьд атнууд арзагналдав. Н. Энхбаяр үзнэ гэв. У. Хүрэлсүх үгүй гэв. Засаг барьж байгаа том намын дарга том л байдаг. Намаа ч өөрийгөө ч хүчтэй, нэр хүндтэй байгаа гэдгээ боломж олдвол нотлон харуулж байх үүрэгтэй. Өөрөөр хэлвэл ачааны хүндийг өөр дээрээ үүрч байх учиртай. Гэтэл хэвлэлийн мэдээнээс үзвэл МАН-ын дарга, Ерөнхий сайд маань дээрх үнэнээс займарч зугтаасан бололтой. Намынхан нь та нутагтаа үз, ялалт авчирч намын нэр хүнд өндөр байгаа гэдгийг нотол гэсэн юм байх. Харин Хүрэлсүх надад давхар дээл хангалттай байхад би өрсөлдөөд яахав гэж тэс хөндлөн юм хэлсэн гэнэ. Уул нь намыхан нь та даараад байгаа учир дээлээ давхарла гэсэн утгаар хэлсэнгүй. Нэг суудлаар дутсандаа ч тэр биш. Хамгийн гол нь намын нэр хүнд унах болоод байгаа учир энэ сонгуульд манай нам заавал ялах ёстой. Манай намын хамгийн нэр хүндтэй хүн бол та. Тийм учир намын дарга та өрсалдөж ялалт байгуул гэсэн утгаар хэлж гэдэг нь хэнд ч тодорхой.
Үнэхээр хүчтэй улс төрчид нөхөн сонгуульд ялалт байгуулсаар ирсэн жишиг тогтсон гэхэд болно. Н.Энхбаяр Завханы нөхөн сонгуульд. М.Энхболд Баянголын нөхөн сонгуульд ялалт байгуулж намынхаа аминд орж байлаа.Өөр жишээнүүд ч байгаа. Монголын сонгуульд нутгархах үзэл маш хүчтэй нөлөөлж,ялалтын хувь заяаг шийддэг.Энэ утгаараа бол Н. Энхбаяр, Н. Энхболд нар “хүний нутагт” хүч түрэн ялж чадаж байжээ.
Гэтэл У.Хүрэлсүх яагаад нутагтаа өрсөлдөхөөс татгалзав аа? МАН-ын хамгийн нэр хүндтэй хүчтэй улс төрч гээд намын дарга, ерөнхий сайд болсон хүн шүү дээ. Хамгийн хүчтэй зоригтой нь айгаад байвал МАН-аас хэн өрсөлдөх юм бол Нэг шатрын хүү юү? Олон нийтийн таамаглаж байгаагаар үхсэн буурын толгойноос амьд ат айна гэгчээр олон жил доор нь байсан урдныхаа дарга Н.Энхбаяраас айв уу?
Нийгмийн нэг хэсгийн санаа бодлын илэрхийлэл гэж хүндэтгэн үзээд жирийн иргэн миний бичсэн энэхүү нийтлэлийг сайтдаа нийтэлж өгөхийг хүсье.
Хүндэтгэсэн Ж.Энхболд
