ТОМЧУУД АА ХААЛГАА НЭЭГЭЭЧ!!!
2012 оны 9 р сарын 3 ны өдөр хичээлээ тараад ээжтэйгээ хөтөлцөөд явж байсан 12 хон настай Есүгэн охины дээрээс барилгын кран унаж амь үрэгдсэн. Кран унахдаа охины тархийг бяц цохисон байсан. Хөөрхий аав нь охиныхоо хөрж амжаагүй тархийг гараараа цуглуулан уйлж суусан гээд бод доо. Зул , цэцэг хоёроор л " гол зогоож" арайхийн амьдарч буйгаа Цензургүй ярианд ярьж билээ. Тухайн үед талийгаач охины эцэг Монгол төрийн эцэг болсон Ерөнхийлөгч Ц.Элбэгдоржоос тусламж гуйсан юм. Охиных нь аймшигт насан эцэслэл энэ төрийг цаламдсан авлига хүнд сурталыг үгүй болгох хөшөө нь болоосой гэж хүссэн билээ. Охиныхоо нас барсан өдрийг Авилга хүнд суртлын эсрэг өдөр болгож дахиад нэг ч хүүхэд томчуудын хариуцлагагүй байдлын золиос бүү болог гэж гуйсан ч тухайн үеийн Ерөнхийлөгч тоогоогүй юм....
Хүүхдийн паркын тоглоом хугарч хүүхдүүд цус нөжтэйгөө холилдон гэмтэв. Паркыг хаав. Тэд торгуулаад л эргээд ажиллана. Паркын асуудлаар өнөөдөр нэг ч хэвлэл мэдээлэл таг. Аманд нь мөнгө чихчихсэн учраас тэр. Сургуулийнхаа биеийн тамирын талбайд хөлбөмбөг тоглох гэж очсон хүү төмөр хаалганд нь даруулж амиа алдав. Сургуулийн захирлыг нь халаад л гүйцээ. Дараа нь дахиад л томилчихно. 29-р тусгай сургуулийн захирлыг хүүхдүүдийн эрхийг ноцтой зөрчдөг гээд ажлаас тухайн үед халсан. Сарын дараа дахиад л томилсон байдаг.
Хөлбөмбөгийн талбайн төмөрт даруулж нас барсан хүү аавтайгаа утсаар ярихдаа " аав аа би удахгүй. Та ирэхдээ зайрмаг, ундаа, хөлбөмбөгийн хувцас авчраарай" гэсэн байдаг. Харамсалтай тэр хүү хэдхэн минутын дараа томчууд бидний хариуцлагагүйгээс болж аавдаа захьсан хөлбөмбөгийн хувцасаа үүрд өмсөж чадахгүй болсон юм. Өчигдөр эмийн сангийн хаалганы бариулаас атгаад тогонд цохиулж 11 хэн настай хүү амь үрэгдэв.Одоо яах бол!!! Эмийн сангийн захирлыг халах уу.... Эсвэл хаалганы бариулыг авч хаях уу... Одоо бид айж байна. Хүүхдээ гадаа гаргаж тоглуулахаас, хичээлд нь явуулахаас... Гэрт нь түгжих үү??? Томчуудын, компаниудын, албан тушаалтнуудын ХАРИУЦЛАГАГҮЙН ГАЙ-гаас болж энхрий бяцхан үрс минь үрэгдсээр байх уу???
Стокгольм хотын Парламентын ордны ард нэг жаахан хүүгийн тохой хүрэхгүй хөшөө байдаг. Тэр гуйлгачин, ядуу хүү байж. Өлсөж даараад парламентын ордны гадаа очиж суугаад шөнөдөө хөлдөж нас баржээ. Хүүгийн эцсийн үг “Томчуудаа хаалгаа нээгээч”... Тэр хүүгийн нас барсан яг тэр буланд “Хүүхдийн эрхийг хамгаалах”-ын төлөө гуйлгачин хүүгийн дүрээр жаахан хүрэл хөшөө босгосон нь Шведийн ард түмэнд бол хүүхдийн эрхийн төлөө хийсэн хамгийн том хөшөө болон үлдсэн байдаг юм. Швед улс тэр цагаас хойш хүүхдийн төлөө төсөвтөө хамгийн ихээр мөнгө төлөвлөж хүүхдийг төрийн бодлогынхоо тэргүүнд тавьсан юм. Өнөөдөр Монголд хүүхдийн талаарх төрийн бодлого үгүйлэгдэж байна. БИД АЙЖ БАЙНА. БИД УЙЛЖ БАЙНА. МОНГОЛЫН ХҮҮХДҮҮД ЯМАР Ч БУРУУГҮЙ ШҮҮ ДЭЭ!!! ТОМЧУУД АА ХААЛГАА НЭЭГЭЭЧ!!!
Сэтгүүлч Л.Мөнхбаясгалан
