Өнгөрсөн наймдугаар сарын 24-ний өдөр МУИС-ийн оюутнууд "сургалтын төлбөр хэт өндөр байна, сурагчдын ар гэрийнхнийг бодолцон үзэж, инфляцийн түвшинтэй харьцуулж байж сургалтын төлбөрөө нэмнэ үү" гэх уриа лоозонг барин жагссан. Энэ үеэр МУИС-ийн Социологи нийгмийн тэнхимийн багш О.Мөнхбат нь сургуулийн оюутнуудыг "Даварсан юмнуудыг зайлуулаач" хэмээн зандарч, мөн оюутнуудыг малаар нь дуудаж, тайлбар шаардсан оюутнууд руу дунд хуруу гаргасан юм. Түүний эл үйлдэл иргэдийн дургүйг ихээхэн хүргэж, БСШУС-ын сайд Ц.Цогзолмаа хариуцлага тооцохыг МУИС-ийн удирдлагуудад сануулсан байдаг.
Тэгвэл одоо болтол тус багшид ямар нэгэн хариуцлага тооцоогүй байна. Учир нь МУИС-ийн захиргаа нь Ёсзүйн хорооноос гаргасан дүгнэлтийг үндэслэн хэн нэгэн багшид хариуцлага тооцох эрх нь үүсдэг байна. Гэтэл Ёсзүйн хорооноос одоо хүртэл ямар нэгэн дүгнэлт гаргаагүй байгаа аж.
Тиймээс хариуцлага тооцоогүй Ёсзүйн хорооны дүгнэлтийг хүлээж байгаа болохыг МУИС-ийн удирдлагуудын зүгээс тайлбарлалаа.
Б.Аз
