Монгол улсын Ерөнхийлөгч Х.Баттулга он солигдох мөчид нийт ард иргэдэд хандан "Тэтгэврийн зээл"-ийн нэг удаа тэглэх тухайгаа Монголын Үндэсний олон нийтийн телевизээр хэлсэн билээ. Уг асуудалд олон эх сурвалж өөр өөрийн өнцөгөөс тайлбарлаж буй. Тэгвэл БНН-ын дарга Б.Жаргалсайхан өөрийн цахим хуудсандаа ийнхүү нийтэлжээ.
БНН-ын дарга Б.Жаргалсайхан: "Тэтгэврийн зээлийг тэглэх Ерөнхийлөгчийн саналын талаар УИХ-ын гишүүд сүрхий ярьж байна. Ихэд санаа зовон тооцоо судалгаагүй, боломжгүй, поп амлалт гэцгээж байна. Г.Занданшатарын олж ирсэн Салхитын мөнгөний ордыг эдийн засгийн эргэлтэнд оруулаад... Харганы ноос түүгээд гэдэгтэй харьцуулж байх шиг байна. Хятадууд булаалдаад байсан Салхитын мөнгөний ордыг тойрсон үйл явц бол баялгийн эзэн хэн бэ, шударга ёсны төлөөх тэмцэл гэдгээрээ үнэ цэнэтэй, үр өгөөжтэй юм.
Яараад байгаа, гарц хайсан УИХ-ын гишүүдэд хэлэхэд (Хийе гэвэл арга нь олдоно) надад бол тэтгэврийн зээлийг тэглэхэд гарах 800 тэрбум төгрөгийг олох өөр санаа байна. Тухайлбал Хөөн хэлэлцэх хугацаагаар 400 гаруй луйварчид, зальдагчид, авлигачид суллагдах гэж байгаа. Эдгээр луйварчдын улсад учруулсан хохирол 12 их наяд. Тэр хуулийг цуцлаад хохирол төлүүлээд тэтгэврийнхээ зээлийг чөлөөлж болно. 1990 оны дундуур банкны өр барагдуулагчид гэж байлаа. Маш сайн ажилладаг байсан юм шүү. Тийм баг бүрдүүлмээр байгаа юм. За ер нь АТГ-ынхан тэтгэврийн зээл тэглэх ажлыг хариуцаг..." гэв.
