Улс төрийн намууд хуулийн хугацаанд буюу өнөөдрийн дорор 2020 сонгуульд оролцох Мөрийн хөтөлбөрөө СЕХ-нд өгч төрийн аудит хийлгэх ёстой. Өчигдрөөс зарим намын мөрийн хөтөлбөр хийгээд голлох амлалтууд тодорхой болсон. Харин өнөөдөр СЕХ-нд намууд мөрийн хөтөлбөрөө хүргүүлэх үеэр УИХ-ын гишүүн З.Нарантуяа “АН-ын мөрийн хөтөлбөр “Монгол өрх, хөгжлийн бодлого” нэртэй. Энэ удаагийн мөрийн хөтөлбөрийн гол цэг нь монгол айл өрх бөгөөд өрх бүрийн амьдралын чанарт эрс өөрчлөлт хийж, өсөлт авчрах хөгжлийн хөтөлбөр юм. Бид бүтээдэг, сэтгэдэг, хийдэг хэсгээ дэмжинэ. Монголын төр түүхий эдээ түүхийгээр нь гаргадаг биш, үйлдвэрлэдэг орон болохын төлөө хөгжлийн загвараа тодорхойлсон. Баялаг бүтээгч жижиг, дунд үйлдвэрлэл эрхлэгчдээ түлхүү дэмжинэ. Эцэст нь монгол хүнийг, монгол өрхийг дэлхийн дундаж орлоготой иргэн, өрх болгоход манай мөрийн хөтөлбөр чиглэгдсэн. Сарын цалингийн дундаж хэмжээг гурван сая төгрөгт хүргэнэ. Иргэдийг үнэгүй орон сууцаар хангахыг урьтал болгохгүй. Хөдөлмөрийн үр шимээр орон сууц худалдаж авах тэр орлогыг бий болгоно” гэв.
Тус намын удирдлагууд тав хоногийн хугацаанд Мөрийн хөтөлбөрт төрийн аудит хийгдсэний дараа 2020 оны сонгуульд оролцох амлалт, зорилтын талаар дэлгэрэнгүй тайлбарлаж мэдээлэх юм байна.
