БАРИЛГА УГСРАЛТЫН ҮЕ ШАТНЫ АЖЛЫН ЧАНАР, ХЯНАЛТЫН ТОГТОЛЦОО ЗӨВЛӨГӨӨН БОЛЖ БАЙНА

Барилга байгууламжийн чанарын асуудал нь барилгын материал, барилга байгууламжийн зураг төсөл, барилга угсралтын үе шатны ажлын чанар хяналтаас шууд хамаарна.

Тиймээс Барилга хот байгуулалтын яамнаас “Барилга байгууламжийн чанарын улсын зөвлөгөөн арга хэмжээг 10-р сарын 22-нд зохион байгуулахаар боллоо. Улсын зөвлөгөөний хүрээнд “Барилгын материалын чанар, хяналтын тогтолцоо” салбар хуралдаан, Барилга байгууламжийн зураг төсөл, хяналтын тогтолцоо салбар хуралдааныг тус тус зохион байгууллаа. Тэгвэл өнөөдөр “Барилга угсралтын үе шатны ажлын чанар, хяналтын тогтолцоо” сэдэвт салбар хуралдааныг Барилгын хөгжлийн төвд зохион байгуулж байна.

Энэхүү зөвлөгөөнийг барилга байгууламжийн үе шатны ажлын чанарыг хэрхэн сайжруулах, тулгамдаж буй асуудлыг богино хугацаанд төр, хувийн хэвшлийн хамтын оролцоотой хэрхэн шийдвэрлэх арга замыг эрэлхийлж, гарц гаргалгааг хайхын тулд зохион байгуулж байгаа юм.

Өнөөдрийн байдлаар барилга угсралтын чиглэлээр 5,932, барилга байгууламжийн зураг төсөл боловсруулах чиглэлээр 868, өргөх байгууламж, түүний эд ангийн үйлдвэрлэл, угсралт засвар үйлчилгээ эрхлэгч 214, барилгын материалын үйлдвэрлэлийн 532 аж ахуйн нэгж нийт 14,429 аж ахуйн нэгж байгууллага бүртгэлтэй байгаа юм. Үүнээс 7,509 буюу 52 хувь нь идэвхтэй үйл ажиллагаа явуулж байгаа бөгөөд барилгын салбарт 73,7 мянган ажилчид ажиллаж байна.

Эдгээр аж ахуйн нэгж байгууллагуудын гүйцэтгэж буй барилга байгууламжийн чанар, хяналтын тогтолцоог сайжруулахад хүний нөөцийн чадавхийг сайжруулах, сургалтын тогтолцоог бүрдүүлэх, аж ахуйн нэгж, байгууллагын дотоод хяналтыг боловсронгуй болгох улсын түвшинд хүргэх, барилгын үе шатны ажлуудыг цахимжуулах, барилгын материалын лабораторийн хяналтын үйл ажиллагааг сайжруулах нь нэн тэргүүний зорилго болоод байгааг зөвлөгөөнд оролцогчид онцоллоо.

Зөвлөгөөнд Барилга хот байгуулалтын яам, Барилгын хөгжлийн төв , Монголын Барилгын Инжнерүүдийн Холбоо, Монголын Барилгын Үндэсний Ассоциаци, Монголын Барилгын Гүйцэтгэгч байгууллагуудын Холбоо ТББ-ууд хамтран зохион байгуулж байгаа юм.