Мэргэжлийн хяналтынхан “Экоконстракшн”-ы ичгүүргүй үйлдлүүдийн хаагуур өнгөрөөд байна вэ

-Чанаргүй барилгаараа алдартай “Эко”-гийн С.Нямдаваатай халаас нэгтэй төрийн албан хаагчид хэн бэ-

Иргэдийн хямд үнийн сонголт, орон сууцны хэрэглээгээр наадагч “чанаргүй” барилгыг угсрагч “Экоконстракшн” ХХК Самдан овогтой Баярсайхан, Самдан овогтой Нямдаваа нарын нэр дээр байдаг.

Тэрбээр өнгөрсөн оны есдүгээр сард Нийслэлчүүдийн амь насанд заналхийлсэн гэмт хэрэг үйлдсэн тухайг бид өмнөх нийтлэлдээ дурдаж байсан.

Өөрөөр хэлбэл, Хан-Уул дүүргийн 15 дугаар хороо, Баянмонгол хороолол, Саруул хорооллын оршин суугчид үерийн гамшигт амь нас, эд хөрөнгөөрөө шууд хохирох аюул үүсэх байсан гэсэн үг. Тиймээс л арга заль нь нарийссан С.Нямдаваагийн барилга барих, эхлүүлэх тусгай зөвшөөрлийг цуцлах хангалттай үндэслэл байна гэдгийг БХБ-ын сайд Х.Баделханд өнгөрсөн оны 9 дүгээр сард хаяглаж байсан ч тусыг эс олсон. Яг үнэндээ С.Нямдаваа чанаргүй барилгуудаа зарж борлуулахын тулд зарим нэг хэвлэлийнхэнтэй байрны бартерийн гэрээ хийж рекламны сайнаар чанаргүй амбааруудаа зарж борлуулдаг нь өдгөө нууц биш болсон.

Учир нь тус компанийн барьж, ашиглалтад өгсөн барилгууд тодорхой хугацааны дараа байнга л эзэмшигч, оршин суугчдынхаа үйлийг үздэг гэхэд хилсдэхгүй. Тухайлбал, 2010 онд ашиглалтад орсон даруйдаа 1200 ам.доллараар шоо метр нь үнэлэгдэж байсан Хан-Уул дүүргийн XI хороон дахь “Маршал таун” 216 айлын орон сууц. Харин дараагийнх нь 2011 онд ашиглалтад орсон Баянгол дүүргийн IV хорооны нутагт сүндэрлэсэн 1150 айлын багтаамж бүхий “Голден парк” хотхон, Баянзүрх дүүргийн VIII хороонд баригдсан 240 айлын орон сууц, Баянгол дүүргийн IV хороонд 374, тус дүүргийн VII хороонд 240, V хороонд боссон 264 айлын орон сууцуудыг өнөөдөр аль ч банк барьцаанд авдаггүй гэдэг.

Гэсэн ч тус компанийн хувьд нийслэлд үнэ хүрч болохуйц хамаг л газрыг “эзэмшин” даахгүй нохой булуу хураахын үлгэрээр зөвшөөрлөө цуцлуулж ч байсан түүхтэй. Алга дарам газрыг сандайлж, арав гаруй давхар өндөр орон сууц барьж ашиг олохын тулд тус компани чанаргүй барилга барьсаар байгаа нь хачирхалтай. Түүгээр ч зогсохгүй олон жил энэ салбарт үйл ажиллагаа явуулж буй тэдний талаар оршин суугчид болон захиалагчид нь байнга гомдол мэдүүлдэг. Тэгсэн хэрнээ тусгай зөвшөөрөлтэйгээ оршин тогтносоор. Бас барилга, байшингуудыг нь Улсын комисс хүлээж авсаар байдаг нь тун хачирхалтай.

Саяхан Монголын Зам, барилгын материалуудын химийн инженерүүдийн холбоо ТББ-ын мэргэжлийн инженерүүдийн санаачлагаар 1996 оноос хойш ашиглалтад орсон орон сууцны барилга байгууламжуудад үзлэг, шалгалт хийжээ. Ингэхэд Улаанбаатар хотын нийт барилга байгууламжийн 80-90 хувь цууралт бяцралт үүсч, цаашид он удаан жил ашиглах боломжгүй болж байгааг илрүүлсэн байдаг.

Түүгээр ч зогсохгүй тэд ан цав эвдрэлт, цууралт үүсээд байгаа 300 гаруй барилгын зургийг баримтжуулан олон нийтэд мэдээлж эхлээд байгаа. Үүний шалтгаан нь маш энгийн 1990-ээд оноос хойш Монголын бараг бүх барилгын компаниуд Туул голоос олборлосон элс, хайргыг ашиглан барилга барьж буй. Гэтэл голын тохойн ийм элс хайрга, стандартын шаардлага хангахгүй, барилгын даацыг дийлэхгүй байдагтай холбоотой гэж үзэж байгаа.

Энэ бол ердөө л ТББ санаачлан УИХ-ын гишүүн А.Сүхбатад Туул гол ойр орчмын элс, хайрга барилгын ажилд тохирохгүй гэдгийг сануулсан ажилтай холбоотойгоор л эхэлсэн. Тэгвэл яг мэргэжлийн байгууллагууд юу хийж байна вэ.

“Экоконстракшн” ХХК гэх энэ компанийн барьсан барилгын оршин суугч, эзэмшигчдийн гомдол захаас аван байх төдийгүй ижил үйл ажиллагаа эрхэлдэг аж ахуйн нэгжүүд ч тэдний чанаргүй үйл ажиллагаагаа нуухын тулд охин компани байгуулж бусдыг төөрөгдүүлдэг талаар ч хэлдэг. Үнэхээр ч “Экоконстракшн” ХХК, “Русский Улаанбаатар пропертиз, Русский констракшн ХХК гээд тоочвол нийслэлд өнгө нэмсэн олон барилгыг харж болно.

Ийм байтал Мэргэжлийн хяналтынхан болоод БХБ-ын сайд Х.Баделханы багийнхан тэдний толгойг илсээр байгааг ойлгоход тун бэрх. Тэд тус компанийн тусгай зөвшөөрлийг цуцлах хангалттай шалтаг шалтгаан олон байхад яагаад гараа хумхин сууна вэ.

Бид дараагийн дугаартаа тус компани барилгын зах зээлд хэрхэн яаж зүсээ хувирган орж буйг өгүүлэх болно.

Үргэлжлэл бий…

Эх сурвалж: Erennews.mn