Нийгэм / 2019/10/10 / 6

ГАЗРЫН ТОС БОЛОВСРУУЛАХ ҮЙЛДВЭРИЙН ДЭД БҮТЦИЙГ АШИГЛАЛТАД ОРУУЛЛАА



Монгол Улсын Засгийн газар БНЭУ-ын 1 тэрбум ам.долларын хөнгөлөлттэй зээлийн хөрөнгө оруулалтаар “Газрын тос боловсруулах үйлдвэр барих төсөл”-ийг хэрэгжүүлж, дэд бүтцийн барилга байгууламжийг 2019 онд багтаан барьж байгуулах үүрэг хүлээсэн билээ. Энэхүү төслийн хүрээнд нийт 27 километр төмөр зам, 21.13 километр хүнд даацын хатуу хучилттай авто зам баригдаж, улсын комисс ажиллан, ашиглалтад хүлээн авлаа. Үйл ажиллагааны нээлтэд Монгол Улсын Ерөнхий сайд У.Хүрэлсүх, Батлан хамгаалахын сайд Н.Энхболд, Зам, тээврийн хөгжлийн сайд Б.Энх-Амгалан, Уул уурхай, хүнд үйлдвэрийн сайд Д.Сумъяабазар, Гадаад харилцааны сайд Д.Цогтбаатар, УИХ-ын гишүүн Б.Дэлгэрсайхан, Эрчим хүчний дэд сайд Т.Гантулга, БНЭУ-аас Монгол Улсад суугаа Онц бөгөөд Бүрэн эрхт Элчин сайд М.П.Сингх, БНЭУ-ын Газрын тос, байгалийн хийн сайд Д.Ш.Пратхан, Дорноговь аймгийн Засаг дарга Т.Энхтүвшин, Монгол газрын тос боловсруулах үйлдвэр ТӨХХК-ийн захирал Д.Алтанцэцэг болон албаны бусад хүмүүс, орон нутгийн иргэд оролцов.

Ерөнхий сайд У.Хүрэлсүх үйл ажиллагааг нээж хэлсэн үгэндээ “Өнгөрөгч оны 6 сард Монгол Улсын аж үйлдвэрийн хөгжлийн нэгэн шинэ хуудсыг нээж, Монгол газрын тос боловсруулах үйлдвэрийн шавыг тавьж байсан бол өнөөдөр үйлдвэрийн дэд бүтцийг манай залуус хугацаанаас нь өмнө ашиглалтад оруулж байна. Засгийн газар ч энэхүү төсөлтэй холбоотой шийдвэрүүдийг цаг тухайд нь яаралтай шийдвэрлэж байсан. Эрчим хүч, эрүүл хүнс, газрын тос гурвыг өөрсдөө үйлдвэрлэдэг болсон цагт Монгол Улс хөгжинө” хэмээн онцлов.

Зам, тээврийн хөгжлийн сайд Б.Энх-Амгалан “Өнөөдөр Монголчууд өөрсдөө хяналтаа тавьж, зураг төслөө боловсруулж, өөрсдөө бүтээн босгож чаддаг гэдгээ харуулсан сайхан үйл явдал болж байна. Манай Улаанбаатар төмөр замынхан 27 километр төмөр зам, Зэвсэгт хүчний 7780 дугаар ангийнхан Монголын анхны хүнд даацын авто замыг өөрсдийн хүч, нөөц бололцоогоор, чанарын өндөр түвшинд барьж байгууллаа. Энэхүү төмөр зам нь Хөөт-Бичигт, Чойбалсан-Эрээнцав-Соловьёвск хүрэх Монгол Улсын төмөр замын сүлжээний хэвтээ тэнхлэгийн эхлэл болж байгаагаараа онцгой ач холбогдолтой. Түүнчлэн Таван толгой-Зүүнбаян, Зүүнбаян-Ханги чиглэлийн төмөр замууд ашиглалтад орсноор Сайншанд нь Монголын хоёрдахь том өртөө болоод зогсохгүй олон мянган хүн ажлын байраар хангагдаж, улс орны эдийн засагт ихээхэн үр ашгаа өгөх бүтээн байгуулалтын эхлэл тавигдаж байна” хэмээн онцлон тэмдэглэлээ.   

БНЭУ-ын Газрын тос, байгалийн хийн сайд Д.Пратхан “Монгол Улсад 1,5 сая тонн газрын тосны боловсруулах хүчин чадалтай үйлдвэр байгуулж буй нь эртний түүхэн уламжлалт найрсаг харилцаатай хоёр улсын нөхөрлөлийн бэлгэ тэмдэг юм. Монголын талын хүсэлтээр 236 сая ам.долларын нэмэлт санхүүжилтийг манай Засгийн газраас хийхээр шийдвэрлэсэн. Хоёр орны стратегийн түншлэлийг улам хөгжүүлэхийн төлөө хамтран ажиллах болно" гэв.     

БНЭУ-ЫН ГАЗРЫН ТОС, БАЙГАЛИЙН ХИЙН САЙД Д.ПРАТХАНТАЙ УУЛЗАВ

Монгол Улсын Уул уурхай, хүнд үйлдвэрийн сайд Д.Сумъяабазар, Зам, тээврийн хөгжлийн сайд Б.Энх-Амгалан нар Монгол газрын тос боловсруулах үйлдвэрийн дэд бүтцийн нээлтийн үеэр БНЭУ-аас Монгол Улсад суугаа Онц бөгөөд Бүрэн эрхт Элчин сайд М.П.Сингх, БНЭУ-ын Газрын тос, байгалийн хийн сайд Д.Пратхан нартай уулзалт хийж, хоёр орны уул уурхай, зам, тээврийн салбарын хамтын ажиллагааны асуудлуудаар санал солилцлоо.

Б.Энх-Амгалан сайд Монгол Улсын эдийн засагт чухал ач холбогдолтой зам, тээврийн салбарын томоохон төсөл хөтөлбөрүүд хэрэгжиж, монголчууд өөрсдийн хүчээр төмөр замын бүтээн байгуулалтуудаа хийж байгаа талаар дурдаад, цаашид зам, тээврийн салбарт хамтран ажиллах саналаа илэрхийлж, анхааралдаа авахыг хүслээ. Д.Пратхан сайд Монгол, Энэтхэг хоёр улс бол оюун санааны сайн нөхөр хэмээгээд монголын талтай хамтран ажиллах талаар онцгой анхаарч ажиллахаа илэрхийлэв.  

МОНГОЛЫН АНХНЫ ХҮНД ДААЦЫН АВТО ЗАМЫГ УЛСЫН КОМИСС ХҮЛЭЭН АВЛАА

Дорноговь аймгийн Алтанширээ сумын нутагт баригдаж буй Монгол газрын тос боловсруулах үйлдвэр чиглэлийн хүнд даацын тусгай зориулалтын авто замын гүйцэтгэгчээр Батлан хамгаалах яамны Зэвсэгт хүчний 7780 дугаар анги ажилласан бол Улаанбаатар-Замын-Үүд чиглэлийн Улсын чанартай авто замыг төмөр замтай 2 түвшинд огтлолцуулах 3.68 километр холбоос зам, төмөрбетон гүүрийн ажлын ерөнхий гүйцэтгэгчээр “УБТЗ” ХНН, туслан гүйцэтгэгчээр “Эн Ди Ти Кэй” ХХК, “Их харгуй зам” ХХК, “Туулын гүүр далай” ХХК ажиллалаа. Төмөр зам, авто замын ТЭЗҮ болон нарийвчилсан зураг төсөл боловсруулах, барилгын ажилд техник технологийн хяналтыг хэрэгжүүлэх зөвлөхөөр “Зам, тээврийн хөгжлийн төв” ТӨҮГ болон “Ай Си Ти Сайн консалтинг” ХХК-ийн түншлэл сонгогдон ажилласан юм. Энэхүү авто замын далангийн өргөн 15 метр, хөдөлгөөний зурвасын тоо 2, хучилтын өргөн 9 метр, замын тэмдэг 286 ширхэг, суурийн доод үе 30 сантиметр, 4-6 хувийн цементээр бэхжүүлсэн суурь 20 сантиметр, 6-8 хувийн цементээр бэхжүүлсэн суурь 20 сантиметр, 5 сантиметр дунд ширхэглэлийн асфальтбетон хучилт, 3 сантиметр жижиг ширхэглэлийн асфальтбетон хучилт бүхий монголын анхны хүнд даацын авто зам бөгөөд Азийн авто замын сүлжээний АН-3 чиглэлд холбогдож байгаагаараа онцлог юм.

МОНГОЛЧУУД ТҮҮХЭНДЭЭ АНХ УДАА ӨӨРСДИЙН ХҮЧЭЭР ТӨМӨР ЗАМ БАРИВ

Монголчууд анх удаа өөрсдийн хүч, нөөц бололцоогоор төмөр зам барьж, ашиглалтад оруулсан түүхэн үйл явдал боллоо. Газрын тос боловсруулах үйлдвэрийг Сайншанд хоттой холбосон 27 километр төмөр замын бүтээн байгуулалтын ажлын ерөнхий гүйцэтгэгчээр Монгол-Оросын хувь нийлүүлсэн УБТЗ нийгэмлэг, туслан гүйцэтгэгчээр “NDTK” ХХК, “Их харгуй зам” ХХК, “Туулын гүүр далай” ХХК тус тус ажиллав. Төмөр замын нийт уртад 16  Хонгорын овоо өртөөний барилга, цэвэр бохир ус, цахилгаан хангамжийн инженерийн шугам сүлжээтэй холбогдсон, салбар төмөр замын урт 18,8 километр, зөрлөг салаа нийт 8 замтай бөгөөд 1,53 сая тонн ачаа тээвэрлэх хүчин чадалтай юм.  



  • Gansukh · [83.249.55.98] · 2019/10/12

    DEMJIJ BAINA. ULAM AMJILT


  • Bo · [202.131.230.90] · 2019/10/11

    Хүрэлсүх сайдийн хийж байгаа ажлуудыг дэмжиж явдаг шүү. Улам ихийг хийнэ гэдэгт итгэлтээ байдаг. Улам эрч хүчтэй байгаарай.


  • Д.Г · [202.9.42.148] · 2019/10/11

    Ерөнхий сайд Хүрэлсүхэд баяр хүргэж, Амжилт хүсье. Мэдрэмж , хурд, хүчтэй, зоригтой ажилласанд талархаж байна. Улам эрч хүчтэй ажиллаарай.


  • Иргэн · [66.181.184.101] · 2019/10/11

    Маш сайн Эээ дээ энэ улс орныг аврах хувь заяа та нарт л байж дээ,хичээгээд байгаарай


  • Зочин · [203.91.115.42] · 2019/10/11

    хүрэлсүх сайд маань асар их дарамт шахалт гүтгэлэг доромжлолыг тэвчин юм хийх гээд л зүтгээд байнадаа хөөрхий бүү шантраарай та


  • ИРГЭН · [202.180.220.172] · 2019/10/11

    БАЯР ХҮРГЭХЭЭС ӨӨР ЯАХАВ ОЙРЫН ХЭДЭН ЖИЛДЭЭ ИЙМ САЙХАН МЭДЭЭГ СОНСОЖ БАЙГААГҮЙ ХҮМҮҮС ЧИНЬ ЭНЭ ЗАСГИЙН ҮЕД Л САЙХАН МЭДЭЭГ ОЙР ОЙРХОН СОНСОЖ БАЙГААДАА ИРГЭД БИД ЧИНЬ ТАЛАРХАН ХҮЛЭЭН АВЧ БАЙНА. ИРЭЭДҮЙ ОДОО ГЭРЭЛ ГЭГЭЭТЭЙ ХАРАГДАЖ БАЙНА. ХҮРЭЛСҮХ ЕРӨНХИЙ САЙДАД БАЙЯРЛАЛАА. ҮНЭХЭЭР ДАЙЧИН МЭДРЭМЖТЭЙ ХУРД ХҮЧТЭЙ ЕРӨНХИЙ САЙД БАЙНАА. УЛАМ ИХ АМЖИЛТ ХҮСЭН ЕРӨӨЕ.