Тэтгэврийн зээлийн НИЙТ ДҮН 680 ТЭРБУМ ТӨГРӨГ байна


Шинэ оны зааг дээр Ерөнхийлөгч Х.Баттулга монголчуудадаа хандан мэндчилгээ дэвшүүлэхдээ тэтгэврийн зээлийг нэг удаа тэглэнэ гэв. Тэтгэврийн зээл авсан ахмадууд болон гэр бүлийнхэн нь гэнэтийн энэ мэдэгдлийг баярлан хүлээж авлаа. Харин зарим нь иргэдээ ялгаварлан гадуурхлаа, сонгууль угтсан  шоу эхэллээ гэх мэтээр төрийн гурван өндөрлөгийн хамтын шийдвэрт эгдүүцэв.      

Нийгмийн даатгалын ерөнхий газраас мэдээлснээр Монгол Улсын хэмжээнд 381 мянган иргэн сар бүр тэтгэвэр авдаг. Тэдний 60 хувь буюу 230 мянган тэтгэвэр авагч арилжааны банкнаас тэтгэвэр барьцаасан зээлд 680 тэрбум төгрөг авчээ. Үүнд зээлийн хүү багтаагүй. Өнгөрсөн онд тэтгэврийн зээлийн хүү 10 хувь, 2018 онд 12 хувь, 2017 онд 15 хувь, 2016 онд 18 хувь байсан юм. Хэзээ зээл авснаас хамааран хүү багтаан тооцвол тэтгэврийн зээлийн нийт дүн 1 их наяд төгрөг давах магадлалтай.  

Нийгмийн даатгалын ерөнхий газар тэтгэврийн зээлийн хүүг үе шаттайгаар бууруулахын тулд тэтгэвэр авагчдад 6 хүртэлх сарын тэтгэвэртэй тэнцэх хэмжээний зээлийг 15 хувийн хүүтэй олгох ажлыг 2017 оны нэгдүгээр сард эхлүүлсэн.

Тэтгэврийн зээлийн жилийн хүүг ийнхүү 18 хувиас 3 хувиар бууруулснаар 2017 онд нийт  95600 тэтгэвэр авагч 76 тэрбум төгрөгийн зээлийг сарын 1.25 хувь, жилийн 15 хувийн хүүтэй авч, 1,3 тэрбум төгрөгийн зээлийн хүүгийн дарамтаас чөлөөлөгдсөн байна.

Нийт тэтгэвэр авагчдын 91 хувь нь ХААН банк болон Төрийн банкнаас тэтгэврээ авдаг. Өнгөрсөн  онд тэтгэврийн зээлийн 12 хүртэлх сарын зээлийн хүүг дахин бууруулж, 10 хувьд хүргэх тохиролцоонд Нийгмийн даатгалын ерөнхий газар дээрх банкуудтай хүрсэн. Гэхдээ энэ нь 12 сарын хугацаатай зээлд л хамаатай. Үүнээс урт хугацаагаар зээл авах бол ахмадууд дунджаар 18 хувийн хүүтэй зээл авах юм.

12 САРЫН ХУГАЦААТАЙ ТЭТГЭВРИЙН ЗЭЭЛИЙН ХҮҮ

  • 2016 он-18 хувь
  • 2017 он-15 хувь
  • 2018 он-12 хувь
  • 2019 он-10 хувь

УРТ ХУГАЦААТАЙ БУЮУ 24 ХҮРТЭЛ САРЫН ТЭТГЭВРИЙН ЗЭЭЛИЙН ХҮҮ

  • 2019  он-18 хувь
  • 2019 оны 10 дугаар сарын 1-15.6 хувь
  • 2020 он-13 хувь

ТЭТГЭВРИЙН ЗЭЭЛИЙН ХҮҮ БУУРАХ ХЭРЭЭР ЗЭЭЛДЭГЧИЙН ТОО ӨСЖЭЭ

Өнгөрсөн онд тэтгэврийн зээл авсан ахмадуудын тоо огцом өсөж,  189 мянгад хүрчээ. 2017 онд 99 мянга, 2018 онд 53 мянган иргэн зээл авсан байна.  


Энэ мэдээ таалагдаж байвал: