ЭМЯ-наас коронавирусийн өдөр бүрийн ээлжит мэдээллээ хийлээ. Мэдээллийн эхэнд ЭМЯ-ны ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирус бүртгэгдэж, 7.7 сая хүн өвчилсөн. 435 мянган хүн энэ өвчний улмаас нас барсан байна. Сүүлийн 24 цагт 118 мянган хүн шинээр өвчилж, 3000 гаруй хүн нас баржээ. Өвчлөлийг өмнөх өдрийнхтэй харьцуулвал өвчлөл 8000, нас баралт 800 хүнээр багассан үзүүлэлттэй байна.
ОХУ-д 24 цагийн дотор 8835 хүн шинээр өвчилж, нийт тохиолдлын тоо 528 мянга хүрсэн байна. Эрхүү, Буриад Читад өмнөх өдрийнхөөс 50-190 тохиолдлоор нэмэгдэж өвчлөлийн эрч буурахгүй байна. Тухайлбал, Тувад 199 хүн шинээр өвчилж, нийт өвчлөлийн тоо 2494 болж, 4 хүн нас барсан байна. Энэ нь сүүлийн 14 хоногийн хугацаанд Тувад коронавирусийн халдвар хамгийн өндөр бүртгэгдсэн үзүүлэлт байна. Читид 89 хүнээр өвчлөл нэмэгдэж, нийт 1996 хүн өвчилж, 40 хүн нас барсан байна.
Манай улсын хувьд ажиглалтад шинээр 5 хүн орж, 9 хүн тусгаарлалтаас гарч гэрийн ажиглалтад шилжсэн. Одоогоор тусгаарлалтад нийт 2061 иргэн байна. Тусгаарлах байранд 1-5 насны 57 хүүхэд, 39 жирэмсэн эмэгтэй, архаг хууч өвчтэй 82 хүн байна.
Төмөр замын эмч, орон нутгийн 17 чиглэлийн галт тэргэнд ажилласан. 5327 иргэнд тандалт судалгааг явуулахад коронавирусын сэжигтэй тохиолдол илрээгүй. 24 цагийн хугацаанд 119 утсанд 165 дуудлага ирсний дийлэнхи нь вирусийн урьчилан сэргийлэлт, зусланд гарахад юуг анхаарах талаар болон эмнэлзүйн талаар мэдээлэл авахаар ханджээ.
Иргэд олон нийтийн газраар явахдаа амны хаалт зүүж, бээлий өмсөж сонор сэрэмжээ алдахгүй байхыг сануулж байна” хэмээлээ.
ХӨСҮТ-ийн захирал Д.Нямхүү "2020 оны зургадугаар сарын 14-нд ХӨСҮТ-ийн хоёр, Дархан-Уул аймагт салбар лабораторид 258 хүний шинжилгээ хийлээ. Коронавирус илрээгүй, бүгд сөрөг гарсан. Тавдугаар сарын 26-нд Москва-Улаанбаатар чиглэлээр ирсэн хүмүүсийн давтан шинжилгээ, Алтанбулагийн боомтоор орж ирсэн 27 авто тээврийн жолоочийн шинжилгээг хийсэн байна.
Өнөөдөр 10 хүн эдгэрч, дараагийн шатны сувилал руу шилжиж байна. Эдгэрсэн 10 хүний найм нь оюутан байна. Мөн 49-65 насны хоёр хүн 17-55 хоног эмчлэгдэн гарч байна. Оюутнуудын эмчилгээний хоногт цөөн байна. Элэгний хавдартай 64 настай эмэгтэй 45 хоног эмчлэгдэн амжилттай эдгэрлээ. Энэ бол маш сайн мэдээ. Хамгийн их анхаарал тавьж байсан хүн юм. 49 настай хүн 55 хоног эдгэрч гарлаа. ХӨСҮТ-д 132 хүн тандалт, судалгаа, эмчилгээнд байна” хэмээв.
