УИХ дахь МАН-ын бүлэг өнөөдөр хуралдаж, СЕХ-ны удирдлагуудыг чөлөөлөх асуудлыг хэлэлцэж байгаа гэсэн мэдээлэл гарсан. Тэгвэл энэ талаар МАН-ын бүлгийн дарга Д.Тогтохсүрэнгээс тодрууллаа.
-Танай намын бүлэг хуралдаж, СЕХ-ны удирдлагуудыг чөлөөлөх асуудлыг хэлэлцсэн гэсэн. Ямар үндэслэлээр чөлөөлж байгаа юм бол. Өнгөрсөн сонгуулиар ямар нэг алдаа гаргасан уу?
-Намын бүлэг хоёр асуудлаар хуралдсан. Засгийн газрын үйл ажиллагааны мөрийн хөтөлбөрийн хоёр дахь хэлэлцүүлгийг УИХ-ын чуулганаар хийсэн. Үүнтэй холбоотойгоор цаашид яаж ажиллах вэ гэдгээ зарим нэг саналаа бүлгийн хурлаар ярилаа. Хоёрдугаарт, СЕХ-ны гишүүнээс чөлөөлөгдөх хүсэлтээ 4 хүн өгсөн. Энэ 4 хүнийг чөлөөлөх, оронд нь хэнийг оруулах вэ гэдэг асуудлыг ярьж, шийдвэрлэлээ.
СЕХ 9 гишүүнтэйгээс 4 нь ийн өргөдлөө өглөө. СЕХ-ны дарга Ч.Содномцэрэн, Нарийн бичгийн дарга Ц.Болдсайхан, гишүүн Э.Батболд, С.Баатаржав гэсэн хүмүүс чөлөөлөгдөх өргөдлөө өгсөн. Энэ хүсэлтийг хэлэлцээд, шийдвэрлэсэн. Шалтгаан нь гэвэл Ч.Содномцэрэн, Ц.Болдсайхан дарга нар тэтгэврийн насанд хүрсэн учраас гавьяаныхаа амралтад гаръя гэдэг хүсэлт гаргасан. С.Баатаржав даргын хувьд улс төрийн албан тушаал шилжсэн. Хуулиараа СЕХ-ны гишүүд төрийн жинхэнэ албан хаагч байх ёстой. Тиймээс улс төрийн албанд шилжсэн учраас намайг чөлөөлж өгөөч гэсэн хүсэлт гаргасныг ёсоор болгосон. Энэ хүмүүсийн оронд 4 төрийн албан хаагчийг нэр дэвшүүлсэн байгаа.
-Оронд нь томилогдож байгаа хүмүүсийн талаар мэдээлэл өгч болох уу?
-Хуулиараа УИХ 5, Ерөнхийлөгч 2 хүнийг СЕХ-ны гишүүнээр нэр дэвшүүлэх эрхтэй. Хоёр хүнийг нь Дээд шүүх нэр дэвшүүлдэг. Энэ хуулийнхаа хүрээнд УИХ 3 хүнийг нэр дэвшүүлж байгаа. ЦЕГ-ын дарга Болдыг нь дэвшүүлсэн. Сонгууль зохион байгуулахад ЦЕГ хэв журмын гол үүргийг гүйцэтгэдэг гэдэг утгаараа. Хоёр дахь нь УИХ-ын Тамгын газрын Хууль эрхзүйн газрын дарга Түвшинжаргал. Энэ бол орон тооны бус гишүүн. Гурав дахь нь, Дэлгэрнаран гээд УИХ-ын Тамгын газар ажиллаж байгаа хүнийг дэвшүүллээ. Дээрээс нь нэмээд Ерөнхийлөгчийн зүгээс Үндэсний аюулгүй байдлын ажлын албаны дарга Д.Даваа-Очир гэдэг хүнийг нэр дэвшүүлсэн. Энэ дөрвөн хүний асуудлыг бүлгийн хурлаар хэлэлцээд, шийдвэрлэх нь зүйтэй гэж үзлээ.
-Өнөөдөр томилгооны асуудлыг ээлжит бус чуулганаар хэлэлцэх үү?
-Томилгооны асуудлыг ээлжит бус чуулганаар хэлэлцэж дуусгана. Чуулганыг өнөөдөртөө багтааж завсарлуулах чигтэй байгаа.
-Ерөнхийлөгч СЕХ-ны удирдлагуудыг яаралтай чөлөөл гэж УИХ-ын чуулганы индэр дээрээс хэлж байсан. Энэ дагуу чөлөөлж байгаа юм уу, эсвэл үнэхээр өөрсдөө хүсэлтээрээ ажлаа өгч байна уу?
-СЕХ-ны удирдлагуудыг ямар нэг шахалтаар чөлөөлж байгаа юм байхгүй. Өөрсдөө хүсэлтээ гаргасан. УИХ-ын сонгуулийн өмнө чөлөөлөгдөх асуудлыг ярьж байсан. Гэвч сонгууль тулсан үед СЕХ-ны удирдлагуудыг өөрчилж болохгүй гэдэг байр суурьтай байсан. Тиймээс одоо хүсэлтийг нь шийдвэрлээд явъя л гэж байгаа юм.
-СЕХ-ны даргыг МАН, нарийн бичгийн даргыг АН-аас томилно гэсэн тохироо хийсэн гэх мэдээлэл байна?
-Энэ хүмүүс чинь төрийн жинхэнэ албан хаагчид. Тиймээс тохироогоор томилоод байх ч албан тушаал биш.
-Даргаар нь хэнийг томилох вэ?
-Гишүүдийн асуудлыг үдээс хойш 14:00 цагт хуралдах чуулганы хуралдаанаар шийдвэрлэх байх. Тэгээд дараа нь амжвал Төрийн байгуулалтын байнгын хороог хуралдуулах төлөвлөгөөтэй байна. Тэр үеэр даргын асуудлыг ярина. Одоо дарга нь тэр болно гэж хэлэх боломжгүй.
