Сонгуулийн ерөнхий хороо(СЕХ)-ны дарга Ч.Содномцэрэн, ерөнхий нарийн бичгийн дарга Ц.Болдсайхан нарыг чөлөөлсөн талаар бид мэдээлсэн.

Тэгвэл УИХ-ын ээлжит бус чуулганаар СЕХ-ны даргаар П.Дэлгэрнаранг, нарийн бичгийн даргаар Д.Даваа-Очирыг тус тус томилов.

УИХ-ын дарга Г.Занданшатар Пүрвээгийн Дэлгэрнаранг СЕХ-ны даргаар томиуулах санал гаргасныг чуулганд оролцсон гишүүдийн 89.7 хувь дэмжээ.

 

Пүрвээгийн Дэлгэрнаран нь 1964 онд Улаанбаатар хотод төрсөн. 56 настай. Улсад 32 жил ажиллаж байгаа бөгөөд үүнээс төрийн албанд 7 дахь жилдээ ажиллаж байгаа туршлагатай.

Боловсрол:

• 1989 онд ЗХУ-ын Москвагийн Цэргийн дээд сургуулийг улс төр судлаач мэргэжлээр
• 1996 онд МУИС-ийн Хууль зүйн сургуулийг эрх зүйч мэргэжлээр тус тус төгссөн

Ажилласан байдал:

• 1989-1990 онд Талх чихэр үйлдвэрийн хорооны дарга
• 1990-1991 онд Улаанбаатар хотын Хөдөлмөрч залуучуудын эвлэлийн дэд дарга
• 1991-1993 онд Улаанбаатар хотын Залуучуудын холбооны дарга
• 1993-1995 онд Хүн ам, бодлого хөгжлийн яаманд ахлах түшмэл
• 1995-1997 онд Улсын Их Хурал дахь намын бүлэгт зөвлөх
• 1997-1999 онд “Прогоноз” төвд эрдэм шинжилгээний ажилтан
• 1999-2000 онд Үндэсний соёл, амралтын хүрээлэнгийн захирал
• 2000-2003 онд Нийслэлийн өмчийн харилцааны газрын дарга
• 2003-2005 онд Баянзүрх дүүргийн Засаг даргын орлогч
• 2007-2012 онд “Автобус 3” компанийн захирал
• 2012-2013 онд Автотээврийн газрын дарга
• 2012-2020 онд “Автотээврийн үндэсний төв” төрийн өмчит үйлчилгээний газрын тэргүүн дэд захирал, захиралын зөвлөх
• 2020 оны 08 дугаар сараас Улсын Их Хурлын Тамгын газрын Захиргаа, хүний нөөцийн хэлтсийн ахлах референтээр ажиллаж байгаа ийнхүү СЕХ-ны даргаар ажиллахаар томилогдож байна. 

Сонгуулийн ерөнхий хорооны нарийн бичгийн даргаар тус хорооны гишүүн Даваанямын Даваа-Очирыг томилуулах саналыг мөн УИХ-ын чуулганд оролцсон гишүүдийн 89.7% нь дэмжжээ.

Даваанямын Даваа-Очир нь 57 настай. 1982-1987 онд ОХУ-ын Дотоод явдлын яамны академид эрх зүйч мэргэжлээр суралцаж төгсчээ. 2005 онд ОХУ-ын Дотоод явдлын яамны академид хууль зүйн ухааны докторын зэрэг, 2006 онд профессор цол хамгаалсан. Д.Даваа-Очир нь 39 жил төрийн албанд ажилласан. 1981 оноос хойш 39 жил хуулийн байгууллагад ажилласан, туршлагатай нэгэн ажээ.