ЭМЯ-ны мэдээллийн үеэр  БШУЯ-ны хөрөнгө оруулалтын газрын дарга Ч. Энх-Амгалан сургууль, цэцэрлэгийн үйл ажиллагаа эхлэх гэж байгаатай холбоотой  боловсролын байгууллагын хөрөнгө оруулалтын  мэдээллийг танилцууллаа.

Тэрбээр “Энэ жил импортоор орж ирэх  барилгын материал, түүхий эдийг оруулж ирэхэд хүндрэл учирсан.   Гэвч өнөөдрийн байдлаар 30 сургууль,  45 цэцэрлэгийн өргөтгөлийн ажил дуусч ашиглалтад оруулсан байна. Энэ жил сургуульд суралцах хүүхдийн тоо 14 мянга, цэцэрлэгийн орны тоо 6 мянгаар нэмэгдсэн. Улсын төсвийн хөрөнгө оруулалтаар шинээр болон он дамжин засварын ажил хэрэгжиж байгаа сургууль, цэцэрлэгийн үйл ажиллагаанууд явагдаж байна. Мөн 171 цэцэрлэгийн засварын ажил явагдсан.  Үүнээс 45 нь ашиглалтад орсон. БШУС-ын салбарт энэ жил өвөлжилтийн бэлтгэл ажлыг хангах , хичээлийн шинэ жилийн бэлтгэл ажлын хүрээнд нийт 104 барилгад засвар үйлчилгээ хийсэн. Энэ нь улсын дунджаар 92 хувийн биелэлттэй явж байна. Одоогоор 35 сургууль, 26 цэцэрлэг, 8 дотуур байрны их засвар дууссан. 14 барилгын их засвар есдүгээр сарын эхний 2 долоо хоногт багтаж дуусна. Мөн 15 сургуульд тавилга, ширээ сандлыг олгох ажлууд хийгдсэн” хэмээлээ.