Хүн бүр үндсэн хуулиар олгогдсон эрүүл, аюулгүй орчинд амьдрах эрхээ хаана эдэлж чадаж байна вэ. Суурин иргэншилд шилжиж, хэн хүнгүй л орон сууцанд амьдрахаар хошуурцгаах болсон. Гэвч гэр хорооллыг сонголгүйгээр шат ахиж орон сууцанд амьдрахыг хүссэн юм бол жаахан дэгтэй байх хэрэгтэй байна. Дөрвөн хана дотор таны мэдэл. Харин байрны гадаах нийтийн эзэмшлийн талбай таны хувийн “ХАШАА” биш гэдгийг санах хэрэгтэй байна. Орон сууцны гадаах талбайд хүүхэд, хөгшид салхилаж, бяцхан жаалууд тоглох газраа олж ядан ийш тийш гүйлдэнэ. Энэ нь нэг ёсондоо оршин суугчдын давуу эрх. Гэтэл энэ үед санаатай ч бай санамсаргүй ч бай дээрээс нь элдэв зүйл шиддэг нь хаанахын ёс вэ. Таны хэнэггүй аль эсвэл залхуурсан үйлдэл бусдын аюулгүй байдалд заналхийлж байгаа нэг хэлбэр болчихоод байна.
Тагтныхаа цонхыг агаар салхи оруулах гэж нээдэг юм уу аль эсвэл элдэв хог, татаж дуусаагүй тамхины ишээ хаях гэж онгойлгодог болсон юм уу. Саяхан нэг оршин суугч унтарч дуусаагүй тамхины ишээ цонхоороо шидсэнээс гадаа нь салхилж явсан тэрэгтэй хүүхдийн дээрээс унаж таарчээ. Азаар нүүр амыг нь түлчихээгүй гэнэ билээ. Аюул зөвхөн шидсэн тамхины ишээр хэмжигдэхгүй. Хэзээ, хэн дээрээс минь архи, пивоны шил шидэхийг хэлж таамаглашгүй. Энэ нөхцөлд бидэнд болгоомж илүүдэхгүй гэдгийг л сануулж байна. Харанхуй гэмээр араншин гаргасан хэвээр байхад их хотын соёлжсон иргэн хэмээх үгийг амнаасаа унагаах шаардлагагүй гэж захья.
Зарим нь тамхины иш тэр байтугай хувинтай шавар шидэж бусдын эд хөрөнгөд хохирол учруулсан хэрэг өмнө хэд хэдэн удаа гарч байв. Шавар шавхайгаа цонхоор шидэх үед доогуур нь хүн явж байсан бол ямар үр дагавар гарахыг таашгүй.
Татаж дуусаагүй тамхины иш, хувин дүүрэн шавар, элдэв хог цаас. Энэ мэтчилэн санаанд орж, нүдэнд харагдсан бүхнээ цонхоороо шидэж бусдын амь нас, эрүүл мэнд, эд хогшилд хохирол учруулдаг байдлаа болимоор юм. Гэр хороололд амьдрах, орон сууцанд амьдрахын ялгаа асар их. Тиймээс нийслэлийн иргэн та эрхээ эдэлж чаддаг шигээ үүргээ ч бас биелүүлж сурах хэрэгтэй болов уу.
