Орон нутгийн сонгуулийн бэлтгэл ажлын талаар СЕХ-оос мэдээлэл хийлээ. Энэ үеэр СЕХ-ны гишүүн, ажлын албаны дарга Д.Баяндүүрэн “Аймаг, нийслэлийн сум дүүргийн ИТХ-ын сонгууль 10 дугаар сарын 15-ны өдөр явагдана. Энэ удаагийн сонгууль аймаг, нийслэл, сум дүүргийн ИТХ-ын сонгуулийн тухай хуулийн дагуу зохион байгуулагдана. Орон нутгийн сонгуулийн бэлтгэл ажил дөрөвдүгээр сарын 30-наас эхэлсэн. УИХ-ын 24-р тогтоолоор орон нутгийн сонгуульд улсын бүртгэлийн техник хэрэгсэл мөн санал авах төхөөрөмжийг ашиглана гэж заасан.
Нэр дэвшүүлэх үйл ажиллагаа наймдугаар сарын 31-нээс есдүгээр сарын 06-ны хооронд явагдаж дууссан. Нөхөн нэр дэвшүүлэх үйл ажиллагаа энэ сарын 21-ныг дуустал үргэлжилсэн. Нэр дэвшигчдийн үнэмлэхийг есдүгээр сарын 30-нд гардуулснаар сонгуулийн сурталчилгаа эхэлнэ.
Улсын хэмжээнд аймаг, нийслэл, сум, дүүргийн ИТХ-ын мандатын тоо 8169 байна. Нийт 17161 нэр дэвшигч өрсөлдөнө. Аймаг, нийслэлийн 816 мандатын төлөө 1901 хүн өрсөлдөхөөр бүртгүүлсэн байна. Харин сумын ИТХ-ын 7062 мандатын төлөө 8 намын 14388 нэр дэвшигч өрсөлдөнө. Дүүргийн ИТХ-ын 291 суудлын төлөө 6 нам эвслээс 693 нэр дэвшигч өрсөлдөнө. Аймаг, нийслэлийн сонгуульд нийт 125 бие даан нэр дэвшигч өрсөлдөнө.
Энэ удаагийн сонгуульд зарцуулагдах 16.6 тэрбумын зардалд ковидтой холбоотой халдвар хамгааллын зардал багтаагүй" гэлээ.
