УИХ-ын чуулганы өнөөдрийн хуралдаанаар Монгол Улсын 2021 оны төсвийн төслийг хэлэлцэж байна. Төслийн төслийн танилцуулгыг Ерөнхий сайд У.Хүрэлсүх хийв.
Тэрбээр "Энэ удаагийн төсвийн төсөл нь цар тахлын үед нэмэгдэж буй төсвийн алдагдлыг бууруулах, төсвийн орлогын бааз суурийг нэмэгдүүлэх, эдийн засгийн өсөлтийг нэмэгдүүлэхэд чиглэгдэнэ. Хуулийн төсөлд төсвийн орлого 11.8 их наяд төгрөг, нийт зарлага 13.9 их наяд байхаар тусгасан. Харин тэнцвэржүүлсэн тэнцэл 2.2 их наяд буюу ДНБ-ий 5.1 хувьд хүргэж, төсвийн үзүүлэлтийг сайжруулсан болно" гэлээ.
УИХ-ын гишүүн М.Оюунчимэг "Мэргэжил сургалт үйлдвэрийн төвүүдээ дэмжиж ажиллана гэсэн Ерөнхий сайдын үг чухал үг. Иргэд ажлын байр хүсч байна. Халамж дэндсэн гэж байна. МСҮТ-үүдэд эрэлт хэрэгцээтэй мэргэжлээр суралцуулах чиглэлээр сургалт хийхэд 36100 гаруй хүн ийм ажлын байранд хүн авмаар байна гэж байна. Өнөөдөр МСҮТ-д 45 хүртэл насны хүн л 200 мянган төгрөгийн тэтгэлэг авдаг юм байна. 50-55 насны эрчүүд МСҮТ-д сураад ажиллах маш их хүч болно. Гэтэл насны хязгаар зааж тэтгэлэг заачихсан нь өнөөдрийн цаг үеийн нөхцөл байдалтай уялдахгүй байна. Санхүүгийн байдлаа харж байгаад насыг нь 55 гээд заагаад өгвөл түр болон байнгын ажлын байр бий болох нөхцөл байна. Эрэгтэй хүний хувьд 50 нас ид залуу нас. Ажлаа хийе гэж байна. Энэ насанд нь ажлын байргүй. Энэ хүмүүс дунд нь орхигдоод байна. Ийм боломж байна уу" гэв.
ХНХ-ийн сайд А.Ариунзаяа "200 мянган төгрөгийг эхлээд насны хязгаар тавиагүй олгож байсан. Энэ хугацаанд хяналтгүй байсан учраас 200 мянган төгрөг авахын тулд гэр бүлийн гишүүд бүгд суралцах, 60-70 настай хүн хүртэл суралцаж тэтгэлэг авах тохиолдол гарсан учраас төр засгаас 45 нас хүртэл хязгаарласан. Орон нутгаар ажиллаж байгаа гишүүд ч тэр, суралцаж байгаа хүмүүс ч тэр 200 мянган төгрөг байлгаасай гэсэн хүсэлтүүд ирсэн учраас мэргэжилт.мн гэсэн цахим хуудас бий болгож, бүх суралцагчдынхаа мэдээллийг нийтэлж, хяналт тавьж байна. 138 мянган ажлын байр шинээр бий болгоно гэсэн төлөвлөлт гарсан. 36 мянган ажлын байр бэлэн байна гэсэн мэдээлэл бий. Тиймээс ойрын ирээдүйд эрэлттэй байгаа мэргэжлээр суралцуулах, ажлын байранд шууд зуучлах ажлуудыг төлөвлөөд явж байна. 2021 оны төсөвт Мэргэжлийн боловрол сургалтыг дэмжих 72.98 тэрбум төгрөгийн хөрөнгө оруулалт тавигдсан байна" гэв.
Б.Бурмаа
