ХХААХҮ-ийн сайд З.Мэндсайхан Бүгд найрамдах Казахстан Улсаас Монгол Улсад суугаа Онц бөгөөд Бүрэн Эрхт Элчин сайд Жалгас Аделбаевтай өнөөдөр уулзлаа. Энэхүү уулзалтаар эдийн засаг, хөдөө аж ахуй, хөнгөн үйлдвэрлэл болон хамтын ажиллагааны талаар ярилцлаа. Сүүлийн жилүүдэд манай улсын мах бэлтгэлийн үйлдвэрүүд мал нядалгааны “халал” стандартыг нэвтрүүлэн ажиллаж байгаа нь Төв Ази, Ойрхи дорнодын орнуудад хийх махны экспортын хэмжээг нэмэгдүүлэхэд түлхэц үзүүлж байгааг ХХААХҮ-ийн сайд З.Мэндсайхан хэллээ. Иймд Монгол Улсаас Бүгд Найрамдах Казахстан Улсад мах экспортлох зөвшөөрөлтэй үйлдвэрүүдийн тоог нэмэгдүүлэх, хоёр орны аж ахуйн нэгжүүдийг хамтын ажиллагааг өргөжүүлэх чиглэлээр хамтран ажиллах нь саналтай байгаагаа тэрбээр илэрхийллээ. Мөн Монгол Улс баруун бүсийн нутгаа “Дэлхийн мал амьтны эрүүл мэндийн байгууллага”-т хүлээн зөвшөөрөгдсөн “Вакцингүй эрүүл бүс” статусаар бүртгүүлэхээр ажиллаж байгаа. Энэхүү зорилтод хүрэхийн тулд Бүгд Найрамдах Казахстан Улсаас туршлага судлан, техникийн туслалцаа авах саналтай байгаагаа энэ үеэр илэрхийллээ.
Уулзалтын төгсгөлд ирэх сарын дундуур төлөвлөгдөж буй Монгол, Казахстаны Засгийн газар хоорондын комиссын хуралдааны зохион байгуулалтын талаар талууд санал солилцов.