Оюу толгой төслийг тойрсон асуудал энэ өвлийн төдийгүй ирэх хаврын гол сэдэв байх нь гарцаагүй боллоо. Нэг долоо хоногийн дотор л маш олон үйл явдал болж байна. Хамгийн сүүлд гэхэд Монголын талаас Рио Тинтогоос татварын томоохон зөрчил илрүүлж, төлөхийг шаардаж байгаа. Түүгээр зогсохгүй Арбитрын шүүхэд маргаан үүсгэж эхэлсэн. Мөн Оюу толгой төсөл 2051 он хүртэл ногдол ашиг тараахгүй, ирээдүйд 22 тэрбум ам.долларын өртэй гэсэн тайлбарыг ЗГ гаргаж тавьсан.
Харин Рио Тинтогийн зүгээс ихээхэн хүчин чармайлт гарган ажиллаж байгаа ч Монголын талын нүүдлээс шалтгаалж Арбитр дээр нэмэлт нэхэмжлэл гаргана гэж мэдэгдээд байна.
Тэгвэл өчигдөр Ерөнхий сайд асан Ч.Сайханбилэг АНУ-аас цахим хуудсаар дамжуулан ЗГХЭГ-ын дэд дарга Б.Солонгод хаягласан нээлттэй захидлыг илгээжээ. Уг захидал нь Б.Солонгод гэхээс илүү Оюу толгой төслийн талаар түүний байр суурь гэж харж болохоор мэдээллүүд байсныг энд онцлох ёстой. Нээлттэй захидлыг бид өмнө нь мэдээлсэн билээ.
Олон нийтийн зүгээс экс Ерөнхий сайдыг холоос ярьж байхаар эр хүн шиг ирээд шалгуулчих гэсэн хандлага дийлэнх байгаа юм.
Тэрээр хилийн чанадаас хэдэнтээ байр сууриа илэрхийлж байсан. Оюу толгойтой холбоотой томоохон албан тушаалтнууд бүгд шүүхийн хаалга татаад байгаа. Энэ нь Ч.Сайханбилэг Монголд ирвэл тэдний араас явна гэсэн итгэл үнэмшил байдагтай холбоотой. Түүнийгээ ч энэ удаагийн захидалд тодорхой илэрхийлсэн байна.
Ер нь Ч.Сайханбилэг цаг сайхан болсон үед л ирэх юм байна. Нэг үгээр Оюу толгой төслийн өнөөгийн хандлага өөрчлөгдөж, энэ төсөл Монголд их хувь нэмэр оруулсан, төслийг хөдөлгөсөн хүмүүс зөв зүйл хийжээ гэж ойлгосон цагт эх орныхоо барааг харах бололтой.
Үүнийгээ тэрээр “...ОТ-ын гүний уурхайн бүтээн байгуулалтыг эхлүүлэх, ОТ-с дутахгүй том үйлдвэр болох Эрдэнэтийг сонголтгүй байсан ч Монголдоо буцааж авчрах шийдвэрүүдийг зоригтой гаргаж чадсан юм. Гэхдээ өнөөдөр шүүмжлүүлж, гүтгүүлж доромжлуулж байгаа ч маргааш Монгол эх оронд минь, Монгол түмэнд минь хэрэгтэй шийдвэрүүд байсан нь өдөр ирэх тутам улам тодорхой болно. Үүний ч нотолгоо болж өнөөдөр хөршөөсөө асуулгүйгээр хүмүүсийнхээ цахилгаан, дулааны мөнгийг даах шийдвэр гаргах боломж нэгэнт бүрджээ....Ирээдүйд ОТ төсөл Монголыг минь авч явах болохоор, төр түмэндээ зүтгэсэн зөв, үр дүнтэй өв үлдээх болохоор, үр хүүхдүүд маань энэ төслийг улс төрийн капиталаа золин байж хийсэн хүмүүсийг зөвөөр ойлгож хүлээн авах нартай өдөр ирэх нь ойлгомжтой...” гэснээс тодорхой харагдана.
Эх сурвалж: shuurhai.mn Г.ОЧИР
