Оффшор бүсээс мөнгө орж ирсэнтэй холбоотой хол зөрүүтэй мэдээллийг төрийн өндөр албан тушаалтнууд өгсөөр байна.

АТГ-аас 2020 оны 2 дугаар сард тус газрын Хэвлэл, олон нийттэй харилцах асуудал хариуцсан ахлах комиссар Т.Баярхүү “2018 онд нийтдээ 74.9 сая. 2019 онд нэмээд 20 орчим сая ам.доллар Монголд орж ирснийг тогтоосон. Нийтдээ 95 сая ам.доллар буюу 300 тэрбум төгрөгтэй тэнцэхүйц хөрөнгө, мөнгөний асуудал яригдаж байна. Гэхдээ энэ бол эцсийн тоо биш.

Тодорхой хэмжээнд албан тушаалаа урвуулж ашигласан, хахуульд авсан мөнгөө оффшор бүсээр дамжуулаад, эргээд Монгол Улсад оруулж ирсэн. Үндсэндээ угаагдаад, эргээд хөрөнгө оруулалт, байшин барилга, тоног төхөөрөмж гэх мэт хэлбэрээр орж ирээд, эдийн засгийн эргэлтэд орчихсон байна гэсэн үг. Үүнийг нь бид тогтооно. Зарим хөрөнгүүдийг битүүмжлээд, хамгаалчихсан байгаа. Хэрэг шүүхээр шийдэгдвэл ийм хэмжээний хөрөнгө хураагдах магадлалтай гэсэн асуудал яригдаж байна” гэж мэдээлэл өгч байв.

Ерөнхийлөгч Х.Баттулга “Оффшор бүсээс хууль бусаар гаргасан мөнгийг оруулж ирэх ажиллагаа сүүлийн 2 жил идэвхтэй үргэлжилж байгаа. Эхнээсээ орж ирсэн. Тэр мөнгөнөөс цар тахлын үед ард иргэдэдээ дэмжлэг болгож тараах ёстой” гэж удаа дараа мэдэгдэж байгаа бол Сангийн сайд асан Ч.Хүрэлбаатар ажлаа өгөхөөсөө өмнө энэ асуудлыг эрс няцааж “Монгол Улсын төрийн дансанд оффшороос нэг ч төгрөг орж ирээгүй” гэж мэдэгдээд амжсан.

Түүгээр зогсохгүй тэрээр “АТГ-ын өнгөрсөн жилийн мэдээг хүмүүс яриад байгаа. Тэр мөнгө нь орж ирээд тухайн эзэн хүмүүсийн бизнесийн үйл ажиллагаанд зарцуулагдаж байгаа гэсэн мэдээллийг АТГ өгсөн. Тэгээд ч тэр үед ярьж байсан Баярхүү гэдэг хүн тус газарт ажилладаггүй” гэсэн тайлбарыг нэмж хийсэн.

Үүнээс харахад оффшорын мөнгө орж ирсэн үү, хаана байна вэ гэдэг асуудал бүр бүрхэг боллоо.

Эх сурвалж: shuurhai.mn Г.ОЧИР